ब्रिटेन नेपाल लयर्स एसोसिएसनद्वारा प्रा सुवेदीलाई बधाई

लण्डन । ब्रिटेन नेपाल लयर्स एसोसिएनले संस्थाका संरक्षक प्राध्यापक सूर्यप्रसाद सुवेदीको नाममा बेलायतको द रोयल एसियाटिक सोसाइटीले वार्षिक पुरस्कार स्थापना गरेकोमा प्राध्यापक सुवेदीलाई बधाई ज्ञापन गरेको छ ।

एसोसिएसनका अध्यक्ष सोलिसिटर दीपक भट्टराईले विहीबार एक विज्ञप्ति जारी गर्दै सुवेदीका नाममा प्रतिष्ठित संस्थाद्वारा पुरस्कार स्थापना हुनु गौरवको कुरा भएको बताउनुभएको छ । प्राध्यापक सुवेदी संस्था र संस्थाका सदस्यहरूका लागि उदाहरण बन्नुभएको पनि विज्ञप्तिमा बताइएको छ ।

सोसाइटीले प्राध्यापक सुवेदीका नाममा घोषणा गरेको पुरस्कार पहिलोपटक सन् २०२३ को सेप्टेम्बर महिनामा प्रदान गर्ने योजना छ । पुरस्कार नेपालका बारेमा अंग्रेजीमा प्रकाशित पुस्तक वा लेखलाई प्रदान गरिने छ । पहिलो पटकको पुरस्कारको लागि समयसीमा ३० मार्च २०२३ सम्म तोकिएको छ । पुरस्कारको विजेतालाई प्रवचन दिन पनि अवसर दिइने छ ।  

सो पुरस्कार सुवेदीको योगदानको कदर गर्दै डा जेम्स बुसटिलले स्थापना गरेका हुन् ।

प्रोफेसर सुवेदी बेलायतको लिड्स विश्वविद्यालयमा अन्तर्राष्ट्रिय कानुनका प्राध्यापक छन् ।