तामाङ्ग सोसाईटी युकेद्वारा घमानसिंह तामाङलाई सहयोग

लण्डन । सेन्ट जर्ज अस्पताल टुटिङ, लण्डनमा उपचार गराइरहेका घमानसिंह तामाङलाई तामाङ सोसाइटी अफ युकेले भेट गरी आर्थिक सहयोग गरेको छ ।

जुन १८ तारिखका दिन सोसाइटीका अध्यक्ष ज्ञान तामाङको नेतृत्वमा गएको सोसाइटीको टोलीले घमानसिंहकी धर्मपत्नी उमा बाइवासित भेट गरी घमानसिंहको स्वास्थ्य अवस्थाका बारेमा जानकारी लिनुका साथै आर्थिक सहयोगस्वरुप २ हजार ७७१ पाउण्ड हस्तान्तरण गरेको हो ।

अस्पतालको नियमअनुसार एक जनाले मात्र बिरामी भेट्न पाउने भएकाले अध्यक्ष ज्ञान तामाङले घमानसिंहलाई अस्पतालको बेडमा भेटेका थिए । घमानसिंहले मुखले बोल्न नसके पनि आँखाबाट आँशु निकालेका थिए ।

सोसाईटीका पूर्व अध्यक्ष धर्म तामाङ्ग, पूर्व उपाध्यक्ष प्रताप तामाङ्ग, पूर्व महासचिव देवराज तामाङ्ग, सदस्य गंगा तामाङ्ग, महासचिव मनी तामाङ्ग र अध्यक्ष ज्ञान तामाङ्गले अस्पतालको भिजिटर कक्षमा बिरामी घमानसिङ तामाङ्गकी धर्मपत्नी श्रीमती उमा वाईबालाई भेटी खादा लगाई उहाँको श्रीमानको शीघ्र स्वास्थ लाभको कामना गरेका थिए । आपत बिपतको घडीमा धैर्यवान, संयम र लगनशील भई आफ्नो लक्ष्यमा अडिग रहन पनि सोसाइटीको टोलीले ढाडस दिएको थियो ।

केही महिनाअघि नेपालको उदयपुरबाट बेलायत आएका तामाङ अचानक बेहोस भएर ढलेका थिए । उनको टुटिङ लण्डनस्थित सेन्ट जर्ज अस्पतालमा उपचार भइरहेको छ ।