सहमहामन्त्रीमा देउवा पक्षको वर्चस्व

काठमाडौं । नेपाली कांग्रेसको सह महामन्त्री पदमा सभापति शेरबहादुर देउवा पक्षले वर्चश्व कायम गरेको छ । उपसभापति र महामन्त्रीमा मिश्रित परिणाम आएका बेला आठ सहमहामन्त्रीमा देउवा पक्षले ६ वटा आफ्नो पक्षमा पारेको हो ।

केन्द्रीय निर्वाचन समितिले शुक्रबार सार्वजनिक गरेको अन्तिम मतपरिणाममा डा. शेखर कोइराला पक्षबाट सहमहामन्त्रीमा दुई जना निर्वाचित भएका छन् ।

देउवा पक्षबाट महिला, आदिवासी जनजाति, मधेसी, मुस्लिम, थारु र खसआर्यमा क्रमश: महालक्ष्मी उपाध्याय (डिना), भीष्मराज आङ्देम्बे, महेन्द्र यादव, फरमुल्ला मन्सुर, उमाकान्त चौधरी  र किशोरसिंह राठौर निर्वाचित भए भने कोइराला प्यानलबाट उम्मेदवार रहेका जीवन परियारले दलिततर्फ र पिछडिएको क्षेत्रबाट बद्री पाण्डे सहमहामन्त्रीमा निर्वाचित भए । पाण्डेले देउवा प्यानलका कर्णालीका मुख्यमन्त्री जीवनबहादुर शाहीलाई पराजित गरेको निर्वाचन समितिका प्रवक्ता जगन्नाथ श्रेष्ठले जानकारी दिए ।

श्रेष्ठका अनुसार अब निर्वाचन समितिको बैठक बसेर आजै राति केन्द्रीय सदस्यको मतगणना सुरु गर्ने तयारी छ ।