काँग्रेस महाधिवेसन: सभापतिमा छ जनाको उम्मेदवारी

काठमााडौँ । नेपाली कांग्रेसको चौधौँ महाधिवेसनमा नयाँ नेतृत्वका लागि छ जनाले सभापतिमा उम्मेदवारी दर्ता गराएका छन् ।

सभापतिमा उम्मेदवारी दिनेहरुमा वर्तमान सभापति शेरबहादुर देउवा, प्रकाशमान सिंह, विमलेन्द्र निधि, डा शेखर कोइराला, कल्याण गुरुङ, युवराज न्यौपाने रहेका छन् ।

सभापतिको चर्चामा रहेका रामचन्द्र पौडेलले उम्मेदवारी नदिने भएका छन् भने अर्का प्रभावशाली नेता कृष्णप्रसाद सिटौलाले देउवालाई समर्थन गरेका छन् ।

देउवाको टीम

प्रधानमन्त्रीसमेत रहेका देउवा आफैं भृकुटीमण्डपमा पुगेर उम्मेदवारी दर्ता गरेका हुन् ।

संस्थापन प्यानलमा उपसभापतिको उम्मेदवारमा विजयकुमार गच्छदार र पूर्णबहादुर खड्का छन् । महामन्त्रीमा डा.प्रकाशशरण महत र प्रदीप पौडेल छन् । पौडेल सिटौला समूहबाट महामन्त्रीका उम्मेदवार बनेका हुन् ।

संस्थापन समूहबाट आठजनाको टुंगो लागेको छ । जसअनुसार आदिवासी जनजातिमा भीष्मराज आङ्देम्बे, दलितमा मानबहादुर बिक, महिलामा डिना उपाध्याय, मधेशीमा महेन्द्र यादव र खस आर्यमा किशोरसिंह राठौर, थारुमा उमाकान्त चौधरी, मुस्लिममा फरमुल्लाह मन्सुर र पिछडिएको क्षेत्रमा जीवनबहादुर शाही उम्मेदवार बनेका छन् ।

डा शेखरको टीम

नेपाली कांग्रेसको नयाँ नेतृत्वका लागि डा.शेखर कोइरालाले सभापतिमा मनोनयन दर्ता गराएका छन् । कोइरालाले युवा पुस्ताका नेताहरूलाई टिममा राखेर प्यानल खडा गरेका छन् ।

शेखरको टिममा उपसभापतिमा चन्द्र भण्डारी र धनराज गुरुङ, महामन्त्रीमा गगन थापा र डा.मिनेन्द्र रिजाल, सहमहामन्त्रीमा बद्री पाण्डे, रामकृष्ण यादव, कमला पन्त, जीवन परियार, देवराज चालिसे, विकास लामा, तेजुलाल चौधरी र शेख वकिल समेटिएका छन् ।

प्रकाशमानको टीम 

प्रकाशमान सिंहको टीमबाट उपसभापतिमा सुजाता कोइराला र महेश आचार्यले उम्मेदवारी दिएकी छिन् भने महामन्त्रीमा विश्वप्रकाश शर्माले मनोनयन गरेका छन् । उनको बाँकी टीम बन्न बाँकी छ ।

विमलेन्द्रको टीम

विमलेन्द्र निधिको टीमबाट हालसम्म उपसभापतिमा दिव्यश्वरी शाह र महामन्त्रीमा डा राजाराम कार्की मात्र खुलेको पाइएको छ ।