बेलायती राजकुमार ह्यारीले पूर्व सहकर्मी गोरखाहरुसित पुनर्मिलन गर्ने

लण्डन । बेलायती राजकुमार ह्यारीले गोरखा भर्तीको २०० वर्षको अवसरमा आयोजना गरिने समारोहमा पूर्व सहकर्मी गोरखाहरुसित भेटघाट गर्ने भएका छन् ।
राजकुमार ह्यारीलाई उद्धृत गर्दै आज बेलायतको प्रतिष्ठित पत्रिका द टेलिग्राफको अनलाइनले उनी अफगानिस्तानमा सँगै काम गरेका गोरखाहरुसित पुनर्मिलनमा सरिक हुने उल्लेख गरेको छ ।
राजकुमार ह्यारीले गोरखाहरुसित सन् २००७/८ मा अफगानिस्तानमा सँगसँगै काम गरेका थिए । अफगानिस्तानको हेल्मण्ड प्रान्त सम्हालेको गोरखा पल्टनमा उनको भूमिका एअर कन्ट्रोलरको थियो ।
गोरखाहरु बेलायती सेनामा प्रवेश गरेको २०० वर्ष पुगेको अवसरमा हुने सो समारोह यही जुनमा हुँदैछ ।
सो समारोहमा बेलायती महारानी, उनका पति ड्युक अफ एडिनवरा र युवराज चार्ल्स पनि सरिक हुने बताइएको छ ।
राजकुमार ह्यारीले गोरखाहरुसित बिताएको त्यतिबेला दुई महिना जीवनकै केही सुखद क्षणहरुमध्ये एक भएको बताउने गरेका छन् । उनले गोरखाहरुको साथमा रहनु जतिको सुरक्षित स्थान कतै नभएको बताएका थिए ।
राजकुमार ह्यारीसितै अफगानिस्तानमा काम गरेका र पछि कन्स्पिसियस गालान्ट्री क्रस (सिजिसी) पदक समेत पाएका सार्जेन्ट दीपप्रसाद पुन राजकुमार ह्यारीसित काम गर्न पाउनु अहोभाग्य भएको बताउँछन् ।
उनले सबै गोरखाहरु राजकुमार ह्यारीसित हुने भेटको प्रतीक्षामा रहेको प्रतिक्रिया दिए ।
सन् १८१४ देखि बेलायती सेनामा गोरखाहरु सेवारत छन् । अंग्रेज-नेपाल युद्धका क्रममा गोरखाहरुको लडाकु र निडरपनबाट अंग्रेज अफिसरहरु प्रभावित भएपछि युद्धविराम गरी गोरखाहरुलाई आफ्नो सेनामा भर्ती गरेको बताइन्छ ।
त्यसयता बेलायतले भाग लिएको सबै लडाइँहरुमा भाग लिएका गोरखाहरुले १३ वटा भिक्टोरिया क्रस जितेका छन् ।
अहिले बेलायती सेनामा करिब ३ हजार गोरखाहरु सेवारत छन् । सेनामा गर्न लागिएको सुधारका क्रममा हाल दुई बटालियनमा रहेका गोरखाहरुलाई एक बटालियनमा झार्ने चर्चा पनि चल्दै छ ।