एनआरएनए युकेले पठाएको १५० थान अक्सिजन कन्सन्ट्रेटर आज नेपाल पुग्दै

लण्डन । गैरआवासीय नेपाली संघ युकेको पहलमा बेलायतका नेपालीहरुद्वारा सहयोगस्वरुप उपलब्ध गराइएको १५० थान अक्सिजन कन्सन्ट्रेटर मेसिन आज नेपाल पुग्ने भएको छ ।

संघका महासचिव फडिन्द्र भट्टराईका अनुसार ती मेसिनहरु चीनबाट खरिद गरिएका छन् र ती मेसिनहरुको भन्सार प्रक्रिया पूरा भइसकेको र आजै नेपाल एयर लाइन्समार्फत नेपाल पुग्ने छ ।

एनआरएनए युकेले बेलायतस्थित नेपाली दुताबाससित समन्वय गरी बेलायतस्थित नेपाली संघसंस्था र व्यक्तिहरुबाट ती मेसिन किन्नका लागि सहयोग संकलन गरेको थियो । जसमा करिब २ करोड ५० लाख नेपाली रुपियाँ बढीको सहयोग संकलन भएको थियो ।

नेपाल पुग्नासाथ ती मेसिनहरु हस्तान्तरण गरिने र अस्पतालहरुमा एक/दुई दिनभित्रैमा पुग्ने विश्वास एनआरएनए युकेले लिएको छ ।

एनआरएनए युकेले नेपालमा कोरोना भाइरसको दोस्रो लहर शुरु भएपछि ‘अक्सिजन पठाउँ नेपालीको ज्यान बचाउँ’ अभियान शुरु गरेको थियो । सो अभियानमा सहभागी सबैलाई एनआरएनए युकेले आभार प्रकट गरेको छ ।