हिमालय मेल डटकमको प्रधान सम्पादकमा निरौला

लण्डन ।  बेलायतबाट सन्चालित अनलाईन पोर्टल हिमालय मेल डटकमले प्रधान सम्पादकमा विपिन निरौलालाई नियुक्त गरेको छ ।

हिमालय मेलका निर्देशक अर्जुन कटुवालले सोमबारदेखि लागू हुने गरी निरौलालाई प्रधान सम्पादकमा नियुक्त गरेका हुन्।

लामो समयदेखि पत्रकारितामा संलग्न निरौला नेपालबाट प्रकाशित र प्रसारित हुने विभिन्न संचारमाध्यममा बेलायतबाट रिपोर्टिंग समेत गर्दै आएका थिए । निरौला नेपाल प्रेस युनियन बेलायतका अध्यक्ष  हुन् ।

सामाजिक अभियन्ताका रुपमा नेपाली समुदायमा परिचित निरौला नेपाल पत्रकार महासंघ यूकेका सल्लाहकार समेत छन् । नेपालमा निरौलाले रेडियो नेपालको ‘घटना र विचार’, जस्तो चर्चित कार्यक्रम सन्चालन गरेका थिए । रेडियो नेपाल बाहेक असल शासन, देशान्तर, घटना र विचार साप्ताहिक लगायतका प्रिन्ट मिडिया कामको लामो अनुभव निरौलासँग छ ।

नेदरल्याण्ड फेलोसिप प्रोग्रामअन्तर्गत रेडियो नेदरल्याडबाट पत्रकारिताको तालिम समेत लिएका निरौला हाल एभिन्युज टेलिभिजनका लागि यूके सम्वाददाता हुन् । पत्रकारिताको अध्ययनका कारण उनी बेलायती राजनीतिमा निरौला राम्रो ज्ञान र चासो राख्छन् ।

निरौलाले बेलायतको लण्डन मेट्रोपोलिटन युनिभर्सिटीबाट पत्रकारिता अध्ययन गरेका छन् । बेलायती पत्रकारितालाई नजिकबाट नियालिरहेका निरौलाको सम्पादकीय नेतृत्वमा हिमालय मेल डट कमले निष्पक्ष र जनहितका लागि ब्यबसायिक पत्रकारिता गर्ने अपेक्षा सन्चालक समितिले गरेको छ ।