गोरखाका मेयरको बेलायत भ्रमणबारे ‘भ्रामक’ समाचार

लन्डन । हाल बेलायत रहेका गोरखा नगरपालिकाका मेयर राजनराज पन्तले आफ्नो भ्रमणबारे केही अनलाइन मिडियाले भ्रामक समाचार संप्रेषित गरेको भन्दै आपत्ति जनाएका छन् । उनले एक स्पष्टिकरण दिंदै गोरखा नगरपालिकाको समग्र विकासका लागि बेलायतमा रचनात्मक सरसल्लाह र अन्तरक्रिया भइरहंदा आएका मनगढन्ते समाचारले आफू दुःखी भएको पनि बताए ।

‘भगिनी सम्बन्ध गांस्न बेलायत पुगेका गोरखाका मेयर पन्त हराए’ शीर्षकमा आफूखुसी, मनगणन्ते, हामीसंग कुनै भेरिफाइ नै नगरी एकतर्फी र स्रोतसमेत उल्लेख नगरिएका समाचार प्रकाशित भएको देख्दा टिठ लागेको छ’-, उनले भनेका छन् ।

उनको प्रष्टिकरण जस्ताको तस्तै-
मेरो नेतृत्वमा गोरखा नगरपालिकाकी कार्यकारी अधिकृत कृष्णकुमारी श्रेष्ठ र पत्रकार किशोर जङ्ग थापा पूर्व निर्धारित कार्यक्रममा भाग लिन बेलायत आएका हौं । कार्यक्रम सफलतापूर्वक सम्पन्न पनि भएको छ । अधिकृत श्रेष्ठ शुक्रबारै नेपाल फर्किसक्नुभयो । हामी गोर्खाली र नेपालीहरुको आयोजनामा भइरहेका कार्यक्रमहरुमा सहभागी भैरहेका छौं । अझै केहि दिन गोर्खालीको आयोजनामा हुने कार्यक्रममा सहभागी हुनेछौं । सबै नियमित कार्यक्रम सकेर हामी स्वदेश फर्कने मिति पनि पूर्ववत जानकारीमै छ ।

बेलायत बसाइको हरेक दिन गोर्खा नगरपालिकाको समग्र बिकासको बारेमा कुनै न कुनै समुदायसंग छलफल भइरहेको छ । यसै सन्दर्भमा ‘भगिनी सम्बन्ध गांस्न बेलायत पुगेका गोरखाका मेयर पन्त हराए’ शीर्षकमा आफू खुसी, मनगणन्ते, हामीसंग कुनै भेरिफाइ नै नगरी एकतर्फी र स्रोतसमेत उल्लेख नगरिएका समाचार प्रकाशित भएको देख्दा टिठ लागेको छ । मलाई सम्मान गर्ने भनिएको लन्डनको एक कार्यक्रमको आधिकारिक निमन्त्रणा पनि प्राप्त नभएको तर अकस्मात अनुपस्थित भएको भन्ने हल्ला गरेर भ्रम फैलाइएकामा मलाई दुःख लगेको छ । त्यस्ता हल्ला र समाचारको भ्रममा नपर्न सबैमा अनुरोध छ ।

राजनराज पन्त, मेयर
गोरखा नगरपालिका