लन्डनमा ‘शुभलभ’ को पहिलो शो उत्साहजनक

लन्डन । लन्डनमा चलचित्र ‘शुभलभ’ को पहिलो शो उत्साहजनक भएको छ । आइतबार साउथ हयारोस्थित गोल्डेनसीप रेष्टुरेन्ट हलमा आयोजित शो ‘हाउसफुल’ भइ दर्शकले रुचाउंदा आफू थप उत्साहित भएको निर्देशक सन्तोष लोहनीले बताए ।

चलचित्र हेर्न एनआरएनए यूके उपाध्यक्ष सुनिलबाबु खड्का, थर्ड आइका विकास देवकोटा, मिसेस नेपाल टिम, स्थानीय कलाकार र सर्वसाधारणको सहभागिता थियो ।

उक्त चलचित्र बेलायतका अन्य शहरमा झण्डै महिना दिनसम्म प्रदर्शनको तयारी छ । निर्देशक लोहनीले १२ तारिख प्लमस्टिड वर्किङ मेन्स क्लब, १८ जनवरी रेडिङको द वेयरहाउस, २० जनवरीमा स्कटल्याण्ड र १६ मा अल्डरसटमा प्रदर्शन मिति तय भइसकेको जनाए । प्रदर्शनका लागि अन्य शहरमा पनि कुरा भइरहेको लोहनी बताउंछन् ।

‘नारी’ पछि ‘शुभ लभ’ लोहनीले निर्देशन रहेको दोस्रो चलचित्र हो । बुद्ध इन्टरटेन्मेन्टको ब्यानरमा निर्माण भएको उक्त चलचित्रमा हरिहर अधिकारी र नवनायिका कृस्टिन पौडेलको मुख्य भूमिका छ । अग्रज कलाकार सरोज खनाल, राजाराम पौडेल, राजा राजेन्द्र, रविन्द्र झा, प्रदीप बास्तोला, अनुज पाण्डे, सूर्या थापा पनि विशेष भूमिकामा छन् । चलचित्रका निर्माता धर्मराज सुवेदी हुन् ।

प्रेम कथामा आधारित भएपनि चलचित्रमा पर्याप्त ‘कमेडी’ छ । ‘नेपाल भ्रमण वर्ष २०२०’ अभियान शुरु भइसकेको अवस्थामा चलचित्रमा हिमाल, तातोपानी कुण्ड, बुद्ध जन्मस्थल लुम्बिनी, देवघाट, पोखरालगायत देशका विभिन्न मनोरम दृश्य भएकाले यसले पर्यटन प्रवर्धन हुने विश्वास निर्देशक लोहनीको छ ।