गायक अमृत क्षेत्रीले नेपाली कक्षाका विद्यार्थीलाई सिकाए गीत-संगीत

लन्डन । चर्चित गायक तथा संगीत शिक्षक अमृत क्षेत्रीले बर्न्टओकस्थित नेपाली कक्षामा अध्ययनरत बालबालिकालाई नेपाली गीत-संगीत सिकाएका छन् । नेपाल सेन्टर युकेको आमन्त्रणमा हाल बेलायत भ्रमणमा रहेका गायक क्षेत्रीले नेपाली भाषा तथा सांस्कृतिक केन्द्रद्वारा शनिवार बिहान आयोजित एक कार्यक्रममा बेलायतमा हुर्कीरहेका बालबालिकालाई गीत/संगीत सिकाएका हुन् ।

‘संगीत यस्तो माध्यम हो जसले हाम्रो भाषा, संस्कृति जोगाउन मद्दत गर्छ’-क्षेत्रीले भने-‘संगीत सुनेर सिकिने विषय हो त्यसैले घरमा, गाडीमा नेपाली गीत लगाइ दिनोस्, बालबालिकाले सुनेरै सिक्छन् ।’

क्षेत्रीले गुरु वन्दना पछि ‘फूलको आँखामा फूलै संसार’, ‘बनेको छ पहराले यो छाती मेरो’, ‘नेपाली हामी रहौंला कहाँ
नेपालै नरहे’, ‘रेशम फिरिरी…’ जस्ता गीत गएर सुनाएका थिए । त्यस्तै, गायिका रचना ज्ञवालीले ‘बालक हामी पबित्र मनका सुन्दर कोपिला’ भन्ने गीत सुनाइन् भने नेपाली कक्षाका स्वयंसेवी संगीत शिक्षक उमेश खड्काले गितारमा साथ दिए ।

कार्यक्रमको शुरुमा बार्नेट काउन्सिलका उपमेयर लक्ष गुरुङ र केन्द्रका अध्यक्ष सुमन प्रधानले गायक क्षेत्री तथा नेपाल सेन्टरका संस्थापक अध्यक्ष निर्मलकुमार थापालाई स्वागत गरेका थिए ।

कार्यक्रम संचालन केन्द्रका सल्लाहकार भोला पनेरुले गरेका थिए । कार्यक्रममा एनआरएनए आइसीसीका पूर्व सल्लाहकार सुरेन्द्र श्रेष्ठ लगायत अभिभावकहरुको पनि उपस्थिति थियो ।