बेलायतका नर्सहरुलाई लाग्यो चुनाव, नेतृत्वका लागि दुई 
आकांक्षी

लन्डन । नोभेम्बर २४ तारिख शनिबार लन्डनमा अधिवेशन 
गर्ने तयारीमा जुटेको नेपलिज नर्सिङ एसोसिएसन यूकेको अन्तिम बैठकले विभिन्न विषयमा छलफल गरेको छ ।

बैठकले निर्वाचन पर्यवेक्षकमा कानुनवीद सोलिसिटर राजु थापालाई छनोट गर्ने निर्णय गरेको छ । यसअघि संस्थापक अध्यक्ष अजिता सिम्खडाको संयोजकत्वमा ५ सदस्यीय निर्वाचन समिति गठन भइसकेको छ, जसमा पूर्व अध्यक्षद्वय बासु लामिछाने र सुशिला कार्की तथा सल्लाहकारहरु मन सुनुवार र कमला पाण्डे सदस्य 
छन् ।

बैठकमा एसोसिएसन अध्यक्ष प्रसुना कंडेलले कतिपय 
नयां सदस्यहरुले संस्था स्थापना भएको दिन अगष्ट २४ मा वार्षिक साधारणसभा नगरिएकोबारे र ‘च्यारिटी कमिसन’ दर्ता विषयमा स्पष्ट पारेकी थिइन् । पूर्व अध्यक्ष सुशिला कार्कीले 
संस्थाको विधान संशोधनबारे बताइन् ।

बैठकमा ‘अनलाइन भोटिङ’ गर्ने वा नगर्ने सम्वन्धमा पनि व्यापक छलफल भएको थियो तर अन्तिममा उपयुक्त श्रोत साधन अभावका कारण त्यो प्रणाली अहिले नअपनाउने निर्णय बैठकले गरेको छ ।

निर्वाचन समिति संयोजक अजिता सिम्खडाले चुनावी प्रक्रियाको समेत तयारी भइरहेको जनाइन् । सिम्खडाका अनुसार, समयसीमाभित्र एसोसिएसनको सदस्यता लिएका व्यक्तिमात्र उम्मेदवार र मतदानका लागि योग्य हुनेछन् । गत १० तारिख नोभेम्बर मध्यरातदेखि 
नयां सदस्यता लिने र नवीकरणको म्याद सकिएको छ । नयां सदस्य बन्न र नवीकरण गर्न अझै मिलेपनि ति सदस्यहरुले मतदानमा भाग लिन भने पाउने छैनन् ।

छैठौं नयां कार्यसमितिका लागि उम्मेदवार बन्न इच्छुकलाई ११ नोभेम्बरदेखि आवेदन खुलेको संस्थाले जनाएको छ । १८ नोभेम्बर मध्यरातबाट यो आवेदन बन्द हुनेछ । २१ नोभेम्बरका दिन उम्मेदवारी फिर्ता र उम्मेदवार एवं अन्तिम मतदाता नामावली प्रकाशित गर्ने कार्यक्रम छ ।

अध्यक्ष, उपाध्यक्ष, महासचिव, सचिव, कोषाध्यक्ष, सहकोषाध्यक्ष, सांस्कृतिक सचिव र ८ जना सदस्य गरि कुल १५ सदस्यीय नयां कार्यसमिति बन्ने अध्यक्ष कंडेलले जनाइन् ।

यसैबीच, एसोसिएसनको नयां नेतृत्वका लागि वर्तमान उपाध्यक्ष विनोद विकास सिम्खडा र संस्थापक सचिव इन्दिरा बस्यालले आकांक्षा व्यक्त गरेका श्रोतले जनाएको छ । आजीवन सदस्य बस्याल दुई कार्यकाल सचिव भएर बीचमा अध्ययनतिर लागेकी थिइन् । सिम्खडाले महासचिवको जिम्मेवारी पनि सम्हालिसकेका छन् । केही आकांक्षीका नाम आएपनि 
संस्थापन पक्ष सहमतिमै नेतृत्व चयन गर्न लागिरहेको जनाइएको छ ।

उम्मेदवारीका लागि यो इमेल [email protected] प्रयोग गर्न संस्थाले आग्रह गरेको छ । अध्यक्ष कंडेलले अधिवेशन सफल बनाउन सबै सदस्यहरुलाई सहभागिताका लागि आव्हान गरेकी छन् ।