युरोपेली मुलुक माल्टा नेपालीको नयां गन्तव्य

लन्डन । युरोप र उत्तर अफ्रिकाको बीचमा रहेको सानो युरोपेली मुलुक माल्टा नेपालीको नयां गन्तव्य बनेको छ । विद्यार्थीबाहेक वर्क परमिट भिसा लिएर नेपालीहरु माल्टा जाने क्रम बढेको हो । अहिले करिब अढाइ सय नेपाली त्यहां विभिन्न क्षेत्रमा कार्यरत रहेपनि रोजगारीका लागि माल्टाबाट थप कामदार माग भएको लन्डनस्थित नेपाली दूतावासले जनाएको छ । लन्डनकै दूतावासले माल्टा सम्वन्धि मामिला पनि हेर्छ ।

‘अहिले माल्टाबाट २४८ जना नेपाली कामदारको माग भई त्यसको प्रमाणिकरणका लागि दूतावासमा अनुरोधपत्र आएको छ’, लन्डनस्थित नेपाली दूतावासका उपनियोग प्रमुख शरदराज आरणले भने । केही समयअघि मात्र माल्टा पुगेर फर्किएका आरणले उक्त देश नेपालीको नयां गन्तव्य बन्दै गएको बताए । आरणसहित सैनिक सहचारी 
प्रदीपजंग केसीले माल्टास्थित नेपाली समुदायसंग अन्तरक्रिया गरेका थिए । माल्टा युनिभर्सिटीमा करिब २० जना नेपाली अध्ययनरत छन् ।

माल्टामा मल्टी नेशनल कम्पनी विशेष गरि सर्भिस सेक्टर र कलकारखाना बढिरहेकाले नेपाली कामदार माग भएको बताइन्छ । त्यहां प्रतिघण्टा साढे ४ युरो ज्याला र मासिक कमाइ करिब ८ सय युरो हुन्छ । खर्च कटाएर मासिक ४ सय युरो वचत हुन सक्छ ।

त्यहां विद्यार्थीलाई काम गर्न भने अनुमति छैन् । ‘तर नेपालका केही म्यानपावर कम्पनीले १२ लाख रुपैयांसम्म लिएर विद्यार्थीले पनि काम पाउंछन्, ५ वर्षमा स्थायी बसोबास अधिकार (पिआर) पाइन्छ भनेर भ्रम फैलाइरहेको पाइयो । त्यो सरासर गलत हो’, आरणले भने ।

उनले भ्रमणका क्रममा माल्टाको विदेश तथा व्यापार प्रवर्धन मन्त्रालयका निर्देशक क्लाउड बोनेलोसंग भेटेका थिए । भेटमा नेपाल र माल्टाबीच सुमधुर सम्वन्ध विस्तार, सहयोग आदानप्रदान र नेपालीलाई रोजगारी एवं विद्यार्थीलाई सहज रुपमा भिसा र काम गर्न अनुमति दिनेबारे छलफल भएको आरणले जनाए । नेपाल र माल्टाबीच द्विपक्षीय परामर्श संयन्त्र बनाउन नेपाल सरकार इच्छुक रहेको समेत आरणले अवगत गराएका थिए ।

माल्टा आप्रवासीहरुकालागि प्रवेश मार्गको रुपमा रहंदै आएको छ । धेरैजसो आप्रवासीहरु युरोपका अन्य मुलुक छिर्नकालागि पहिले माल्टा जाने गर्दछन् । केवल चार लाख जनसंख्या भएको माल्टा सन् २००४ मा युरोपेली संघको सदस्य बनेको हो । 
युरोजोन क्षेत्रको सबैभन्दा सानो अर्थतन्त्र रहेको माल्टाको अर्थतन्त्र व्यापार, पर्यटन र उद्योगधन्दामा आधारित छ ।

ब्रिटेनको भूतपूर्व उपनिवेशको रुपमा रहेको माल्टा सन् १९६४ मा स्वतन्त्र बनेको हो । नेपाल र माल्टाले सन् १९८३ मा दौत्य सम्वन्ध कायम गरेका हुन् । काठमाडौंमा माल्टाको अनरेरी कन्सुलेट रहेको छ भने लन्डनस्थित नेपाली दूतावासले 
माल्टा सम्वन्धि मामिला हेर्दै आएको छ । इकान्तिपुर