होटलमा खर्बौं लगानी, पर्यटकीय पूर्वाधार सुस्त

काठमाडौँ, १ असोज (रासस) – होटल एसोसिएसन अफ नेपाल (हान) ले होटल व्यवसायमा खर्बौंको लगानी भएको भन्दै त्यसअनुसारको पर्यटकीय पूर्वाधार विकास गर्न सरकारको ध्यानाकर्षण गराएको छ ।

हानद्वारा आर्थिक पत्रकार समाज (सेजन) का नवनिर्वाचित पदाधिकारी तथा कार्यसमिति सदस्यलाई आज बधाई तथा शुभकामना ज्ञापन कार्यक्रममा बोल्दै हानका अध्यक्ष अमरमान शाक्यले हस्पिटालिटी उद्योगमा खर्बौंको लगानी भइरहेको र नयाँ लगानी थपिने योजना रहेको बताउनुभयो ।

होटल व्यवसायमा लगानी बढेको तर राज्यबाट पूर्वाधार निर्माणको न्यूनतम आधार पनि तयार नगर्दा पर्यटन व्यवसायमा उत्साह बढ्न नसकेको अध्यक्ष शाक्यको भनाइ थियो ।

निकट भविष्यमा २० लाख पर्यटक अटाउन सक्ने क्षमता तयार पार्ने भएता पनि सरकारले राष्ट्रिय एवं अन्तर्राष्ट्रिय विमानस्थल र सडक सञ्जालको गुणात्मक एवं परिणात्मक वृद्धि गर्न जरुरी भएको हानको धारणा छ ।

सेजनका अध्यक्ष पुष्पराज आचार्यले सेजन र हान हातेमालो गरी दिगो अर्थतन्त्रको विकासका लागि पर्यटनका मुद्दामा ऐक्यबद्धता जनाउँदै अगाडि बढ्ने बताउनुभयो ।

हान र सिटीइभिटीबीच सम्झौता 

हानले हस्पिटालिटीका लागि मागबमोजिम दक्ष जनशक्ति उत्पादन गर्न प्राविधिक शिक्षा तथा व्यावसायिक तालीम परिषद् (सिटीइभिटी) अन्तर्गतको हेल्भीटास इन्टरको–अपरेशसन परियोजनासँग सहकार्यमा उत्पादन गर्ने सम्झौतामा आज हस्ताक्षर गरेको छ ।

उक्त सम्झौतापत्रमा हानका अध्यक्ष अमरमान शाक्य र सिटीइभिटीका सदस्यसचिव पुष्परमण वाग्लेले संयुक्त हस्ताक्षर गर्नुभएको हानका महासचिव विनायक शाहले जानकारी दिनुभयो ।

सो अवसरमा परिषद्का सदस्यसचिव वाग्लेले सिटिइभिटीको तालीम परियोजनामार्फत होटल उद्योगको मागबमोजिम मानव संशाधन उत्पादन गर्ने यो सहमति उत्कृष्ट रहेको बताउँदै यसबाट नेपालको अर्थतन्त्रमा सकारात्मक सन्देश प्रवाह हुने र होटल क्षेत्रमा अझ बढी गुणात्मक सेवा प्रदान गर्न सक्छ भन्नुभयो ।

हानले ‘जव सेन्टर’ सिर्जना गरी होटल उद्योगका लागि मागबमोजिमको दक्ष जनशक्ति आपूर्ति गर्ने महासचिव शाहको भनाइ थियो ।