भूपू गोर्खा गुरुङ काउन्सिलरमा विजयी

लन्डन । बेलायतको स्थानीय राजनीतिमा नेपालीहरुको पनि उपस्थिति 
बाक्लिंदै गएको छ । पछिल्लोपटक लन्डन बरो अफ हङ्स्लो अन्तर्गत होनवर्थ वडामा भूपू गोर्खा विष्णु गुरुङ काउन्सिलर पदमा विजयी भएका 
छन् ।

लेवोर पार्टीका तर्फबाट उनले एकहजार एकसय ७० मत ल्याएर काउन्सिलर पद जितेका हुन् ।
२२ मेमा सम्पन्न स्थानीय निर्वाचनमा लेवोरबाट तीन, कन्जरभेटिभ तीन, यूकिप तीन र एक स्वतन्त्र उम्मेदवार प्रतिष्पर्धामा थिए । तीनजना विजयी मध्ये उनी दोश्रो स्थानमा आए ।

अब पार्टीको निर्देशन अनुसार स्थानीय समुदायको हितमा काम गर्ने उनको अठोट छ । भूपू गोर्खा भएका नाताले गोर्खा मुद्दामा सम्भव भएसम्म सहयोग गर्ने उनले जनाए ।

सन् २००६ अन्तिमदेखि लेवोर पार्टीसंग निकट भएका गुरुङ सन् २००९ यता गोर्खा नेपाली कम्युनिटी हङ्स्लोको अध्यक्ष समेत छन् । यही संस्थामा सक्रिय भएर राजनीतिमा स्थानीय वासिन्दासंग हिमचिम र उनीहरुको विश्वास जितेको उनले बताए । हङ्स्लो कम्युनिटी नेटवर्कको वोर्ड सदस्यमा उनको संस्था पनि छ ।

ब्रिटिश आर्मीमा १९ वर्ष सेवा गरि अवकास प्राप्त उनी गोर्खा सौरपानी गाविस, ६ फुन्चोकका स्थानीय वासिन्दा हुन् । समाजसेवी बाबा धन बहादुर तामाङको प्रेरणाले समाजसेवामा आफू आकर्षित भएको उनले जनाए ।