बग्दादमा मृत्यु हुने २१३, तीन दिन राष्ट्रिय शोक

बग्दाद, २० असार । इराकको राजधानी बग्दादमा आइतबार भएको बम आक्रमणमा परी ज्यान जाने व्यक्तिको सङ्ख्या २०० नाघेको छ ।

यसअघि आइतबार बिहान सबेरै भएको हमलामा ११९ जनाको ज्यान गएको जनाइएको थियो । सो हत्यापछि सरकारले सोमबारदेखि तीन दिनसम्मका लागि राष्ट्रिय शोकको घोषणा गरेको छ ।
इराकी अधिकारीहरुले सोमबार दिएको जानकारीअनुसार उक्त क्षेत्रमा भएको बम हमलामा परी ज्यान जाने व्यक्तिको सङ्ख्या २१३ पुगेको हो ।

आइतबारको आत्मघाती कारबम आक्रमणमा परी घाइते हुनेको सङ्ख्या पनि २०० जना भन्दा बढी रहेको अधिकारीहरुले जानकारी दिएका छन् । त्यस हमलाको जिम्मेवारी इस्लामिक स्टेट्स, (आइएस) ले लिएको छ ।

राजधानी बग्दादमा यस बर्षमा भएका यस्ता हिंसात्मक आक्रमणहरुमा यो सबैभन्दा भीषण आक्रमण भएको बताइएको छ । यस आक्रमणलाई हिंस्रक एवम् भीषण प्रकृतिको भनी सरकारी अधिकारीहरुले प्रतिक्रिया दिएका छन् ।

हमलाको जिम्मेवारी इस्लामिक स्टेट्स, आइएसले लिएको छ । राजधानी बग्दादमा यस बर्षमा भएका यस्ता हिंसात्मक आक्रमणहरुमा यो सबैभन्दा भीषण आक्रमण भएको बताइएको छ । गत हप्तामात्र पनि बग्दादमा भएको हमलामा परी २१ जनाको ज्यान गएको थियो ।

यस आक्रमणप्रति निन्दागर्दै इराक सरकारले सोमबारदेखि तीन दिनसम्म राष्ट्रिय शोकको घोषणा गरेको छ । इराकी प्रधानमन्त्रीले सोमबार बिहान सो घोषणा गर्नुभएको हो । साथै प्रधानमन्त्री हादीले आफूले ती हत्यारालाई कानुनी कारबाहीको दायरामा जसरी पनि ल्याएरै छोड्ने प्रतिबद्धता पनि व्यक्त गर्नुभएको छ ।

यस आक्रमणमा परी थप कम्तीमा पनि १८० जना व्यक्ति घाइते भएका प्रहरीले सोमबार जानकारी दिएको छ । उनीहरुको स्थानीय अस्पतालहरुमा उपचार जारी रहेको इराकी स्वास्थ्य मन्त्रालयले बताएको छ ।

राजधानी बग्दादको नजिकै पर्ने कर्रादा जिल्लामा रहेको सडकमा यस्तो हमला गरिएको हो । कारमा शक्तिशाली बम जडान गरी कार चालकले आत्मघाती रुपमा विस्फोट गराएको हो ।

मुसलमान समूदायको महान पर्व रमादानको अन्त्यमा हुने उत्सवको लागि धेरै सर्वसाधारण व्यक्ति किनमेलका लागि व्यस्त भएको स्थानलाई लक्ष्य गरेर सडकमा सो विस्फोटन गराइएको थियो ।

इराकको फल्लुजा सहर आइएस लडाकू समूहबाट पूर्ण रुपमा इराकी बलले नियन्त्रणमा लिएको एक हप्तापछि यो भीषण आक्रमण भएको बताइएको छ । फल्लुजा इराकको राजधानी बग्दादबाट ५० किलोमिटर पश्चिममा पर्दछ ।

इराकका सरकार विरोधी लडाकूहरुले सन् २०१४ को सुरुबाट नै इराकको फल्लुजा सहर कब्जा गर्दै आएका थिए । फल्लुजा सहर आइएस आतङ्ककारी समूहको एक बलियो प्रभाव रहेको सहरको रुपमा रहेको थियो ।

इराकी सुरक्षाबलले गत मे महिनाबाट सो सहर पुनः नियन्त्रणको लागि सुरु गरेको कारबाहीपछि गत हप्ता सुरक्षाबलले नियन्त्रणमा लिएको थियो । प्रधानमन्त्री हैदरले राजधानी बग्दादको सुरक्षा व्यवस्थामा आमूल परिवर्तन गरिने जानकारी दिनुभएको छ ।
उहाँले सुरक्षामा सुधारको प्रक्रिया सुरु भइसकेको पनि सो सम्बोधनका क्रममा सोमबार बिहान नै जानकारी दिनुभयो ।