मगर संघ यूकेको ‘नेपाली ओपन कन्सर्ट’ जुलाई २५ मा, मन्त्र ब्यान्डको प्रस्तुति रहने

लन्डन । मगर संघ यूकेले आगामी जुलाई २५ मा नेपाली ओपन कन्सर्ट गर्ने भएको छ ।

‘म्युजिक फर युनिटी’ सन्देशसहित शनिबार २५ जुलाई २०२६ मा अल्डरसटस्थित रसमोर एरिनामा कन्सर्ट हुन लागेको हो । मगर संघ यूकेका अध्यक्ष लालबहादुर पुन (लालु)ले विगतका वर्षहरुमा झैँ यस वर्ष पनि बेलायतमा रहेका नेपाली समुदायलाई संगीतको माध्यमबाट एकजुट गराउने उद्देश्यका साथ बृहत् खुला कन्सर्टको आयोजना गर्न लागिएको बताउनुभयो ।

कार्यक्रम दिउँसो १ बजेदेखि राति साढे १० बजेसम्म चल्ने छ । सांगीतिक उत्सवमा ख्यातिप्राप्त मन्त्र ब्यान्डका कलाकारहरूको प्रस्तुति रहने छ । ब्यान्डले बेलायत आउन भिसा प्राप्त भइसकेको आयोजकले जनाएको छ ।

कार्यक्रममा उपस्थित हुन बेलायतवासी सम्पूर्ण नेपालीहरूलाई आयोजकले निमन्त्रणा गरेको छ ।

यस वर्ष उपाध्यक्ष गुमानसिङ थापा मगर कार्यक्रमको प्रमुख संयोजक रहेका छन् । यस संस्था २००२ मा स्थापना भएको हो ।