डायस्पोरिक कथासहित जानु काम्बाङको ‘खाम्योक’ उपन्यास आउँदै

लन्डन । डायस्पोरिक नेपाली साहित्यलाई नेपालमा स-सम्मान स्थापित गराउन प्रयासरत साहित्यकार एवं गीतकार जानु काम्बाङ लिम्बुको छिट्टै पाँचौं कृति सार्वजनिक हुँदैछ ।

बेलायत-हङकङ बस्दै आएकी स्रष्टा लिम्बुको ‘खाम्योक’ उपन्यास पाठकको हातमा आइपुग्न लागेको हो । ‘मेरो पाँचौं कृति ‘खाम्योक’ उपन्यास छापाखानामा तयार हुँदैछ । हङकङमै विमोचन गर्ने उद्देश्य छ,’ पुस्तकको कथावस्तुबारे काम्बाङले विनेपालीसँग भन्नुभयो,’उपन्यास डायस्पोरिक नै छ,बेल्जियमको कथा छ । लिम्बुवानबारे अलिकति उठान गरेको छु ।’

काम्बाङका विभिन्न विधाका प्रकाशित कृतिहरूमा ‘शिविरमा ईश्वर’ कवितासंग्रह, ‘अनुभव’, ‘जानु’ र ‘आँसुको लय’ गीति अल्बम, ‘नउघ्रेको जून’ कथासंग्रह, ‘फ्लाण्डरर्स फिल्डमा तमोरको सुसेली’ नियात्रासंग्रह आदि ।

काम्बाङले छैटौं कृति निबन्धसंग्रह प्रकाशोन्मुख रहेको जानकारीसमेत गराउनुभएको छ । जानुले नेपाली भूमिमा बसेर विदेशी भूमिबाट लेखिएका नेपाली साहित्यलाई हेर्ने दृष्टिकोण सफा हुनुपर्छ, कमजोर आँक्नु भूल हुनेछ । विदेशी भूमिमा बस्ने नेपालीहरूले हर पाइला, हर स्वासमा नेपालको माया र स्नेह बोकी बगाएको पसिना नेपाली भूमिकै लागि खर्चेको हुन्छ । त्यो पसिनाको मूल्य मातृभूमिले सही ढंगमा बुझ्नुपर्छ भन्ने विषय लेखनमार्फत जोडदारकासाथ आवाज उठाउने गर्नुभएको छ ।

सानैदेखि साहित्यमा झुकाव राख्नुहुने उहाँले देश छाडेर हङकङ पुगेपछि लेख्न सुरु गर्नुभएको हो । पहिलो कृति कवितासंग्रह ‘शिविरमा ईश्वर’, गीति एल्बम ‘अनुभव’ २०७२, कथासंग्रह ‘नऊघ्रेको जून’ र ‘जानु एल्बम’ २०७५, गीतिसंग्रह किताब ‘आँसुको लय’ २०७६ लगायत निरन्तरत कोसेसी पस्कँदै आउनुभएको छ ।

साहित्य र संगीत जीवनसँग सम्बन्धित रहेको बताउनुहुने उहाँ आख्यान विधामा रुचि राख्नुहुन्छ । ‘सिर्जना भनेको आत्माबाट अथवा मनबाट सृजित हुने कुरा हुन् । फुरेपछि नलेखी बस्न सकिन्न । वास्तवमा सिर्जना सबै सन्तान हुन् । कति राम्रा स्वस्थ जन्मिन्छन्, कति अस्वस्थ । सबैले मन पराउनु पर्छ भन्ने पनि छैन आफैलाई सन्तुष्टि मिले भो,’ जानु काम्बाङ भन्नुहुन्छ ।