लन्डनमा लमजुङ समाज यूकेको १९औं वार्षिक साधारणसभा सम्पन्न

लन्डन । लमजुङ समाज यूकेको १९औं वार्षिक साधारणसभा सम्पन्न भएको छ । अध्यक्ष पूर्णराज गुरुङको सभापतित्वमा अल्डरसटस्थित ठमेल रेष्टुरेन्टमा शनिबार १८ अप्रिल २०२६ मा आयोजित सभामा विभिन्न पदाधिकारी तथा सदस्यहरूको सहभागिता रहेको थियो ।

कार्यक्रममा वार्षिक तथा आर्थिक प्रतिवेदन प्रस्तुत गरिएको थियो भने समाजका गतिविधि, भावी योजना र घर खरिदसम्बन्धी कार्ययोजनाबारे छलफल गरिएको थियो । साथै, ट्रष्टीको भूमिका, युवाको सहभागिता र आर्थिक व्यवस्थापनका विषयमा पनि प्रस्तुति राखिएको थियो । महासचिव कृष्ण गुरुङले १८औं वार्षिक साधारणसभादेखि अहिलेसम्मको समाजको गतिविधिहरुबारे प्रतिवेदन प्रस्तुत गर्नुभएको थियो । त्यस्तैगरी कोषाध्यक्ष उमरजंग (यूजे) गुरुङले आर्थिक प्रतिवेदन, आमा समूहकी उपाध्यक्ष मनिता (मुना) गुरुङले आमा समूहको वार्षिक प्रतिवेदन प्रस्तुत गर्नुभएको थियो ।

समाज घर खरिद योजनाबारे संयोजक तथा संस्थापक अध्यक्ष चन्द्रप्रसाद गुरुङले पावर पोइण्टद्वारा कार्ययोजना प्रस्तुत गर्नुभयो । क्याप्टेन दिपक घलेले नेपाली राष्ट्रिय महिला फुटबल खेलाडी सावित्री भण्डारी (साम्बा) को उपचारार्थ समाजका सदस्यहरुले सहयोग गरेको रकम हस्तान्तरण गरेको बारे प्रस्तुति राख्नुभएको थियो ।

सभामा समाजका संस्थापक अध्यक्ष चन्द्रप्रसाद गुरुङ, पूर्वाध्यक्षहरु कृष्ण गुरुङ, तुलाराम गुरुङ, विश्वजंग गुरुङ, ट्रष्टी शेर सुनार, सल्लाहकार पूर्णचन्द्र म्हेगीलामा गुरुङ र आमा समूहकी संस्थापक अध्यक्ष तथा सल्लाहकार ईन्द्र गुरुङले शुभकामना मन्तव्य दिनुभएको थियो भने गत वर्षका कार्यक्रम संयोजकहरूलाई सम्मान गरिएको थियो । गत वर्षको मुख्य तीन विशेष कार्यक्रमका संयोजकहरु वरिष्ठ उपाध्यक्ष परशु गुरुङ, उपाध्यक्षद्वय कुमार गुरुङ र श्रीमती माला गुरुङलाई अध्यक्ष पूर्णराज गुरुङले क्रेगी खादा लगाई सम्मान गर्नुभएको हो ।

नेपालबाट भर्खरै बेलायत आउनुभएकी लोकप्रिय गायिका मन्जु विकलाई समाजकी प्रथम महिला जमुना गुरुङले खादा र पुष्पगुच्छा दिई स्वागत गर्नुभयो ।

अध्यक्ष पूर्णराज गुरुङले यस वर्षको समरपार्टी तथा हाउजिंग प्रोजेक्ट च्यारिटी डिनर कार्यक्रमको संयोजक वरिष्ठ उपाध्यक्ष परशु गुरुङ, नेपाली मेलाको सहभागिताको लागि संयोजक उपाध्यक्ष माला घले र विन्टर पार्टी संयोजक उपाध्यक्ष कुमार गुरुङलाई जिम्मेवारी दिनुभयो ।

साधारणसभा सञ्चालन महासचिव कृष्ण गुरुङले गर्नुभएको थियो भने समाजका वरिष्ठ उपाध्यक्ष परशु गुरुङले बैठकको महत्त्वबारे प्रस्ट्याउनुभएको थियो ।

अन्त्यमा अध्यक्ष पूर्णराज गुरुङले सदस्यहरूको योगदानप्रति आभार व्यक्त गर्दै सभा समापन गर्नुभएको थियो ।