लन्डनमा एम्बुलेन्समा आगजनी, छानबिन गर्ने बेलायती प्रहरीको भनाइ

लन्डन । लन्डनको गोल्डर्स ग्रीनस्थित यहूदी स्वयंसेवक संस्था हात्जोलाका चारवटा एम्बुलेन्समा मध्यराति भएको आगजनीलाई ‘यहूदीविरोधी घृणाजन्य अपराध’ का रूपमा छानबिन गरिने बेलायती प्रहरीले जनाएको छ ।

गोल्डर्स ग्रीनको हाईफिल्ड रोडमा पार्क गरिएका चार एम्बुलेन्समा सोमबार बिहान करिब १:४० बजे आगजनी भएको थियो । लन्डन फायर ब्रिगेडले एम्बुलेन्समा लागेको आगो निभाउने क्रममा भित्र यसभित्रका ग्यास सिलिन्डर पड्किएर सीसा फुटेको जनाएको छ । आगो नियन्त्रणका लागि ६ वटा दमकल र झण्डै ४० जना अग्निनियन्त्रक खटाइएको थियो । यस घटनापछि महानगरीय प्रहरीले आसपासका घर खाली गराउँदै झन्डै ३० जनालाई सुरक्षित आश्रयस्थलमा सारिएको बताइएको छ ।

प्रहरीले सार्वजनिक गरेको सीसीटीभी फुटेजमा तीन जना शंकास्पद व्यक्ति एम्बुलेन्सतर्फ हिँड्दै गएको र त्यसपछि आगो लगाएको देखिन्छ । तर अहिलेसम्म कोही पनि पक्राउ परेका छैनन् । बेलायतका स्वास्थ्य मन्‍त्री वेस स्ट्रिटिङले सामाजिक सञ्जाल एक्समार्फत् घटनालाई घृणित आक्रमणको संज्ञा दिएका छन् ।

सन् २०२१ को जनगणनाअनुसार बेलायतका इङल्यान्ड र वेल्समा झन्डै ३ लाख यहूदी बस्छन् । गत वर्ष अक्टुबरमा म्यानचेस्टरमा दुई जना यहूदी धर्मालम्बीमाथि कारमा छुरा प्रहार भएको थियो ।