सुरेश सिंह धामीको उपचारमा नेपाल पत्रकार महासंघ बेलायतको आर्थिक सहयोग

लन्डन । नेपाल पत्रकार महासंघ बेलायत शाखाले कन्चनपुरका पत्रकार सुरेश सिंह धामीको उपचारका लागि ६५ हजार ५०० रुपैयाँ सहयोग गरेको छ ।

नेपाल पत्रकार महासंघ कन्चनपुर जिल्ला शाखाका अध्यक्ष धामी पाचन प्रणालीसँग सम्बन्धित ग्रन्थि (प्यान्क्रियाज)मा ट्युमरका कारण उपचाररत हुनुहुन्छ । केही महिनाअघि पहिलो चरणको शल्यक्रिया सम्पन्न भए पनि दोस्रो चरणको उपचारका लागि थप खर्च आवश्यक परेको छ ।

सहयोग रकम मंगलबार नेपाल पत्रकार महासंघकी अध्यक्ष निर्मला आचार्यलाई बेलायत शाखाका सचिव तथा नेपाली समाचारका सम्पादक विश्वास दिप तिगेलाले हस्तान्तरण गर्नुभयो । कार्यक्रममा महासंघका महासचिव रामप्रसाद दाहाल, कोषाध्यक्ष रामकृष्ण अधिकारी, बेलायत शाखा सदस्य र सितलपाटी न्यूजका सम्पादक वाचस्पति रेग्मीलगायत उपस्थित हुनुहुन्थ्यो ।

नेपाल पत्रकार महासंघ कन्चनपुरले धामीको उपचारका लागि सहयोग आह्वान गरेको थियो ।