लन्डन । भूतपूर्व ब्रिटिश गोर्खा ६६ वर्षीय उत्तरबहादुर गुरुङ अल्डरसटस्थित वेलिङटन वार्डमा काउन्सिलर उम्मेदवार बन्नुभएको छ ।
आउँदो मे ७ मा हुने स्थानीय निर्वाचनमा गुरुङ सत्तारुढ पार्टी लेबरका तर्फबाट काउन्सिलर उम्मेदवार बन्नुभएको हो । लेबर पार्टी अभियानमा सन् २००७ देखि नै जोडिएका गुरुङ सन् २०११ पछि सक्रिय बन्नुभएको हो । २०२४ मा सम्पन्न बेलायतको आमनिर्वाचनमा उहाँ लेबर नेतृ अलेक्स बेकरलाई जिताउन मैदानमा निकै खटिए । अलेक्स बेकरले अल्डरसट क्षेत्रबाट लेबर सांसद पनि जित्नुभयो ।
त्यतिबेलैदेखि अलेक्ससंग निकट रहेका उत्तरबहादुर लेबरको आग्रहमै वेलिङटन वार्डमा काउन्सिलर उम्मेदवार बन्नुभएको हो ।
तमुधिं यूके ह्याम्पसायरमा १२ वर्ष अध्यक्षको जिम्मेवारी सम्हालेका उहाँ ग्रेटर रसमोर नेपलिज कम्युनिटी (जिआरएनसी) का वर्तमान उपाध्यक्ष हुनुहुन्छ । बेलायत अल्डरसट निवासी उहाँले ब्रिटिश आर्मीमा १९ वर्ष सेवा गरेर अवकाश लिनुभएको हो ।
