तमु धीं यूकेका पूर्वअध्यक्ष मेजर लालबहादुर गुरुङको ७६ वर्षको उमेरमा निधन

लन्डन । तमु धीं यूकेका पूर्वअध्यक्ष मेजर लालबहादुर गुरुङको ७६ वर्षको उमेरमा निधन भएको छ ।

कास्कीको मादी गाउँपालिका – १, खिलाङ पुर्ख्यौली घर भई बेलायतको फानबोरोमा बस्दै आएका भूपू मेजर लालबहादुरको २९ अप्रिलमा निधन भएको तमु धीं यूकेका संस्थापक अध्यक्ष मिनप्रसाद गुरुङले जानकारी गराउनुभएको छ ।

‘तमु धीं यूकेका पूर्व अध्यक्ष मेजर लालबहादुर गुरुङ एउटा अशल अभिभावक हामीबाट सधैंका लागि बिदा लिएर जानुभएको छ । तर तपाईंको आशीर्बाद, योगदान मार्गदिशा कहिल्यै बिर्सिने छैन । स्वर्गमा बास होस् । तपाईंको आत्माले शान्ति मिलोस् काका निशब्द छु,’ मिनप्रसादले शुक्रबार बिहान फेसबुकमा लेख्नुभएको छ ।

तमु धीं यूकेको चौथौं कार्यसमितिका अध्यक्ष हुनुहुन्थ्यो । लालबहादुर लामो समयदेखि अस्वस्थ हुनुहुन्थ्यो । दिवंगत गुरुङ १/२ जीआरका पूर्वसैनिक अफिसर हुनुका साथै तमु धीँ यूकेका हालका ट्रष्टी र खिलाङ समाज यूकेका प्रमुख सल्लाहकार समेत हुनुहुन्थ्यो । साथै, सिरमूर राइफल्सका पूर्वअध्यक्ष र नेपाल कपका पूर्व खेलाडी पनि हुनुहुन्थ्यो ।