नेपाली दूतावास लन्डनले आगामी ३ मेमा प्रेस्टन क्षेत्र र ४ मेमा स्कटल्यान्डमा घुम्ती विशिर सञ्चालन गर्ने [सूचनासहित]

लन्डन । नेपाली राजदूतावास लन्डनले आगामी ३ मा प्रेस्टन क्षेत्र र ४ मे २०२६ मा स्कटल्यान्डमा घुम्ती शिविर सञ्चालन गर्ने भएको छ । ती क्षेत्रमा बसोबास गर्ने नेपालीहरूको सुविधाका लागि गैरआवासीय नेपाली संघ स्कटल्याण्ड र नेपाली समाज प्रेस्टनको समन्वयमा राहदानी तथा कन्सुलर सेवा शिविर आयोजना गर्न लागेको दूतावासले मंगलबार जनाएको छ ।

शिविर प्रेस्टन र आसपासका क्षेत्रहरू जस्तै म्यानचेस्टर, लिभरपुल, कार्लिस र बोल्टनमा बसोबास गर्ने सेवाग्राहीहरूका लागि लक्षित गरिएको शिविर ३ मे दिउँसो १ देखि ५ बजेसम्म हुनेछ । त्यसैगरी स्कटल्याण्डमा ४ मे बिहान ११ देखि ४ बजेसम्म शिविर सञ्चालन गरिने दूतावासले जनाएको छ ।

घुम्ती शिविरहरूमार्फत राहदानी नवीकरण, अधिकृत वारेसनामा, कागजात प्रमाणीकरण, एकतर्फी यात्रा अनुमतिपत्र र पर्यटक भिसा जस्ता सेवा प्रदान गरिनेछ । यस शिविरमा मे २०२७ सम्म म्याद भएका राहदानीको नवीकरण पनि गर्न सकिने छ ।

विद्युतीय राहदानी नवीकरणका लागि अनलाइन फाराम, सक्कल नेपाली नागरिकताको प्रमाणपत्र, पुरानो राहदानी र अन्य आवश्यक सहायक कागजातहरू अनिवार्य रूपमा साथमा ल्याउनुपर्नेछ। ३४ पृष्ठ भएको राहदानी नवीकरणका लागि एक सय १० पाउण्ड, राहदानी हराएको अवस्थामा दुई सय २० पाउण्ड र १० वर्ष मुनिका नाबालकको हकमा ५५ पाउण्ड शुल्क निर्धारण गरिएको छ । अधिकृत वारेसनामाका लागि सेवाको प्रकृति हेरी ५ देखि ३५ पाउण्ड र कागजात प्रमाणीकरणका लागि ४० पाउण्ड शुल्क लाग्नेछ ।

विस्तृत सूचना हेर्न यहाँ क्लिक गर्नुहोस्