बेलायतमा सवारी दुर्घटनामा नेपाली युवक मारेको अभियोगमा चर्चित र्‍यापर पक्राउ

लन्डन । उत्तर–पूर्वी लन्डनको इल्फोर्डमा एकजना नेपाली युवकको ज्यान जाने गरी भएको सवारी दुर्घटनाको घटनामा चर्चित बेलायती र्‍यापरलाई पक्राउ गरी अदालतमा हाजिर गराइएको छ ।

नेपाली विद्यार्थी २० वर्षीय युविन तामाङको ज्यान जाने गरी भएको दुर्घटनामा बेलायती ग्राइम कलाकार एवम् चर्चित र्‍यापर गेट्स (जस्टिन क्लार्क–स्यामुएल) लाई प्रहरीले पक्राउ गरी अदालतमा हाजिर गराएको हो ।

गत १८ अक्टोबरमा इल्फोर्डको रेडब्रिज लेनमा बीएमडब्ल्यू कारले तामाङलाई ठक्कर दिएर भागेपछि गेट्समाथि ‘खतरनाक तरिकाले सवारी चलाएर गम्भीर चोट पुर्‍याएको’ अभियोगमा दोषी ठहर गरिएको थियो । उपचारको क्रममा तामाङको निधनपछि आरोपलाई ‘खतरनाक ड्राइभिङबाट मृत्यु गराएको’ मा अभियोग रुपान्तरण गरिएको थियो । जानकारी अनुसार दुर्घटनामा ज्यान गुमाएका तामाङ परिवारको एकमात्र सन्तान थिए । उनलाई आफ्नो बुवाआमाले उच्च शिक्षाका लागि यूके पठाएका थिए । पैदल हिँडिरहेका तामाङलाई प्रख्यात अवार्ड वीनर गेट्सले चलाएको कारले मृत्यु गराएपछि प्रहरीले पक्राउ गरी सोमबार लन्डनको बार्किङसाइड मेजिस्ट्रेट कोर्टले न्यायिक हिरासतमा राख्न आदेश दिएको छ ।

उनले अदालतमा आफ्नो नाम, जन्म मिति र ठेगाना पुष्टि गर्नमात्रै बोलेका छन् । न्याययिक हिरासतमा राखिएका उनी अदालनमा पुनः २४ नोभेम्बरमा उपस्थित हुनेछन् ।

प्रहरीले घटनाका प्रत्यक्षदर्शी साक्षीहरु खोजिरहेका छन् । आसपासका सीसीटीभी फुटेज, प्रत्यक्षदर्शीका बयान र घटनास्थलको प्राविधिक अनुसन्धान जारी राखेको छ । प्रहरीले सम्भावित साक्षीहरुलाई सम्पर्क गर्न आग्रह समेत गरेको छ ।

गेट्स एक प्रसिद्ध ग्राइम एमसी, र्‍यापर र गीतकार हुन् । उनलाई मर्करी पुरस्कारको लागि मनोनयन गरिएको थियो । उनले स्टोर्मजी, एड शीरन र स्केप्टा जस्ता प्रमुख कलाकारहरुसँग सहकार्य गरेका छन् । उनले २०२१ मा मोबो अवार्ड्स ‘बेस्ट मेल एक्ट’ जितेका थिए । २०२४ मा ‘ब्रिटिस ब्ल्याक कल्चर’ मा महत्वपूर्ण योगदान दिएबापत ‘मोबो पायोनियर अवार्ड’ प्राप्त गरेका थिए ।