बेलायतको अल्डरसटमा कारले ठक्कर दिँदा दुई पूर्व गोरखा सैनिकको मृत्यु

लण्डन । बेलायतमा नेपालीहरूको बाक्लो बसोबास रहेको शहर अल्डरसटमा बुधबार बिहान कारले ठक्कर दिँदा प्रात: कालिन भ्रमणमा निस्केका दुई पूर्व गोर्खा सैनिकको मृत्यु भएको छ ।

बिहान करिब साढे ६ बजेतिर फ्लीट रोडमा भएको सो घटनामा वयोवृद्ध पूर्व गोर्खा सैनिकहरू कुमबहादुर गुरुङ र कुलबहादुर गुरुङको निधन भएको हो ।

गोर्खा भूतपूर्व सैनिक संघ (गेसो) का सभापति कृष्णकुमार राईका अनुसार उहाँहरू मर्निङ वाकमा निस्कनुभएको थियो । उहाँहरूलाई सडक पार गरिसकेको अवस्थामा कारले ठक्कर दिएको बुझिएको छ ।

कुलबहादुरको घटनास्थलमै र कुमबहादुरको उपचारका लागि अस्पताल लैजाँदालैजाँदै निधन भएको पनि राईले बताउनुभयो ।

घटनामा संलग्न एक ६६ वर्षीय चालकलाई प्रहरीले नियन्त्रणमा लिएको छ ।

गेसो अल्डरसट समितिका सहकोषाध्यक्ष रहेका कुमबहादुर यातायातका नियमहरूका बारेमा सचेत थिए । केही वर्षअघि अल्डरसटमा बाटो काट्ने क्रममा एक पूर्व गोर्खालाई कारले ठक्कर दिएपछि उनी सधैँ हाइभिजिवल ज्याकेट लगाएर हिँड्थे । ‘अरूले किन सधैँ हाइभिजिवल लुगा लगाएको भन्दा उहाँ यो हाम्रो सुरक्षाको लागि हो नि भनेर भन्ने गर्नुहुन्थयो’ कुमबहादुरसित पटकपटक हिँडेका राईले भने ।

राईले सो घटनामा संलग्न चालकलाई पूर्व गोर्खाहरूले चिन्ने गरेको र घटना जातिय द्वेषबाट प्रेरित पनि हुनसक्ने आशंका गरे ।