बेक्सली नेपाली समाजको अध्यक्षमा विजिता गौतम निर्वाचित

लन्डन । बेक्सली नेपाली समाजको अध्यक्षमा विजिता गौतम निर्वाचित हुनु भएको छ ।

संस्थाको आइतबार भएको पाँचौं अधिवेशनअन्तर्गतको निर्वाचनमा प्रतिस्पर्धी केदार थपलियालाई पराजित गर्दै गौतम अध्यक्षमा निर्वाचित हुनुभएको हो । गौतमले १ सय मत पाउनुभएको थियो भने थपलियाको पक्षमा ८७ मत परेको निर्वाचन समितिले जनाएको छ । यसअघि गौतम र थपलिया कार्यसमिति उपाध्यक्ष रहनुभएको थियो ।

निर्वाचन समितिका संयोजक विजय गुरुङले कार्यसमितिका अरु सबै पद सर्वसम्मत भएको पनि जानकारी गराउनुभयो । उहाँका अनुसार दुई वर्षे कार्यकालका लागि उपाध्यक्षमा अहिल्या कुँवर, हिमाल गुरुङ, विमला सापकोटा सेढाईं र शम्भुनाथ अधिकारी उपाध्यक्ष निर्वाचित हुनुभयो ।

महासचिवमा दिकपाल गुरुङ र सचिवमा राजेन्द्र लम्साल तथा कोषाध्यक्षमा तिलक लम्साल र सहकोषाध्यक्षमा विश्वराज पौडेलले जिम्मेवारी पाउनुभएको छ ।

कार्यसमिति सदस्यमा रविन गिरी, मीनाकुमारी थापा, प्रजोति भण्डारी, दिवशनाथ बाँस्तोला र सरिता शर्मा सर्वसम्मत चयन हुनुभयो ।

नयाँ समितिका पदाधिकारी तथा सदस्यहरुलाई निर्वाचन समिति संयोजक विजय गुरुङले शपथग्रहण गराउनुभएको थियो । नवनिर्वाचित समितिलाई समाजका निवर्तमान अध्यक्ष डा हरिश ज्ञवाली, संस्थापक अध्यक्ष केशबहादुर गुरुङ, पूर्वअध्यक्षहरु विजय गुरुङ, आनन्द धरेललगायतले बधाई तथा सफल कार्यकालको शुभकामना दिनुभएको थियो ।

निवर्तमान अध्यक्ष डा ज्ञवालीले पनि कुशलतापूर्वक निर्वाचन सम्पन्न गराउने निर्वाचन समिति एवं आफ्नो कार्यसमितिका सबै पदाधिकारीलाई मायाको चिनोसहित धन्यवाद ज्ञापन गर्नुभएको थियो । उहाँले आफ्नो कार्यकाल सफल बनाउन अहोरात्र खटिने सिंगो कार्यसमिति, सल्लाहकारहरु एवम् सबै सदस्य तथा सहयोगीहरुलाई धन्यवाद दिनुभयो ।

यसअघि निवर्तमान समिति अध्यक्ष डा हरिश ज्ञवालीको अध्यक्षतामा सम्पन्न अधिवेशनको पहिलो सत्रमा महासचिव हिमाल गुरुङको प्रगति प्रतिवेदन र कोषाध्यक्ष नारायण पन्तको आर्थिक प्रतिवेदन पारित गरिएको थियो । बेक्सली नेपाली समाज सन् २००८ मा स्थापना भएको हो ।