स्कटल्यान्डमा दूतावासको आयोजनामा २३ जूनमा ‘नेपाली मेला २०२५’ हुने

राहदानी र कन्सुलर सेवा पनि दिने

लन्डन । नेपाली दूतावास लन्डनले यही २३ जूनमा स्कटल्यान्डको एडिनवर्गमा ‘नेपाली मेला २०२५’ गर्ने भएको छ ।

गैर आवासीय नेपाली संघ स्कटल्यान्ड र स्थानीय नेपाली संघ संस्थाहरुसँगको समन्वयमा सोमबार २३ जूनमा वेस्ट प्रिन्सेस स्ट्रिट गार्डेन्समा नेपाली मेला आयोजना गरिने नेपाली दूतावास लन्डनले जनाएको छ । मेला बिहान १० देखि बेलुकी ६ बजेसम्म हुने छ ।

नेपाल प्रमोट, युवा पुस्ताबीच आपसी चिनजान र उनीहरुलाई नेपाली मौलिक कला संस्कृतिबारे जानकारी एवं नेपाली-स्कटिससँग नेटवर्किङ नै मेलाको प्रमुख उद्देश्य रहेको दूतावासले जनाएको छ ।

मेलामा खाना स्टल, हस्तकला लगायत नेपाली उत्पादनको शो केस, आआफ्नो समुदायको झांकी, पन्चेबाजासहित सांस्कृतिक प्रस्तुति, नेपाल चिनाउने सामग्री वितरण र परेड पनि गरिनेछ ।

यसैबीच एडिनवर्गको मेलास्थलमा दूतावासले राहदानी र कन्सुलर सेवा पनि दिने भएको छ । दूतावासले सूचना जारी गर्दै नेपाली मेला २०२५ को आयोजनास्थलमा राहदानी तथा कन्सुलर सेवा प्रदान गर्ने कार्यक्रमसमेत रहेको जानकारी गराएको हो । उक्त शिविरमा उपस्थित भई आफूलाई आवश्यक परेको सेवाबाट लाभान्वित हुन सबैमा दूतावासले आग्रह गरेको छ ।

कन्सुलर सेवा वेस्ट प्रिन्सेस स्ट्रिट गार्डेन्समा सोमबार २३ जून २०२५ मा दिउँसो ११ देखि साँझसमेम हुनेछ । राहदानी, अधिकृत वारेसनामा, कागजात प्रमाणीकरण, एकतर्फी यात्रा अनुमतिपत्र, पर्यटक भिसा, गैरआवासीय नेपाली परिचय पत्रको सेवा प्रदान गरिने छ ।