फोटो पत्रकार मिलन तमु ‘रश्मूर कम्युनिटी अवार्ड’बाट सम्मानित

लन्डन । गोर्खा मिडिया यूकेका प्रबन्ध निर्देशक तथा फोटो पत्रकार मिलन तमु (मिलनध्वज गुरुङ) ‘प्राइड अफ रश्मूर कम्युनिटी अवार्ड’बाट सम्मानित हुनुभएको छ ।

फानबोरोस्थित भिलेज होटलमा १३ जून २०२५ मा आयोजित विशेष समारोहमा रस्मोर बोरो काउन्सिलका निवर्तमान मेयर तथा अवार्डका संस्थापक मारा माकुनुराले तमुलाई यो सम्मान प्रदान गर्नुभएको हो । पूर्वगोर्खासमेत रहेका तमुले बेलायतमा नेपाली कला, संस्कृति र सञ्चार क्षेत्रमा पुर्‍याएको योगदानको कदर गर्दै उक्त अवार्ड प्रदान गरिएको हो ।

अवार्ड ग्रहणपछि पत्रकार तमुले भन्नुभयो, ‘सरप्राइज्ड र प्राउड फिल भयो । नेपालीहरू पनि यो अवार्डमा सहभागी हुन पाउँदा अत्यन्तै गर्व लागेको छ ।’

सैनिक सेवामा रहँदै फोटोग्राफी सुरु गरेका तमु हाल गोर्खा मिडिया डटकम सञ्चालन गर्दै आउनुभएको छ, जहाँबाट उहाँ बेलायतस्थित नेपाली समुदायका समाचार र गतिविधिहरू उजागर गरिरहनुभएको छ ।

समारोहमा तमुसहित अल्डरसट ग्यारिसन,अल्डरसट टाउन एफसी, फान्बोरो सिक्स फर्म कलेज, फार्नबोरो एयरपोर्ट, फार्नबोरो कलेज अफ टेक्नोलोजी, फार्नबोरो एफसी, ग्रिट वेस्टर्न रेलवे, ह्याम्पसायर एन्ड फायर सर्भिस,ह्याम्पसायर काउन्टी काउन्सिल, रश्मूर सिटिजन्स एड्भाइस ब्युरो, रश्मूर्स नेबरहुड पोलिस, रोयल मेल, रश्मूर भोलुन्टरी सर्भिस, साउथ इस्ट कोस्ट एम्बुलेन्स सर्भिस र स्टेजकोचलाई पनि अवार्ड प्रदान गरिएको थियो ।