गायक तथा संगीतकार गणेश रसिकको ७८ वर्षको उमेरमा निधन

लन्डन । गायक, संगीतकार तथा साहित्यकार गणेश रसिकको ७८ वर्षको उमेरमा निधन भएको छ ।

ललितपुरको हात्तीवनस्थित नेपाल क्यान्सर अस्पतालमा आइतबार रसिकको निधन भएको हो । उहाँ प्रोस्टेट क्यान्सर पीडित हुनुहुन्थ्यो ।

रसिककी छोरी बेलायतबाट फर्किएपछि दाहसंस्कार गरिने जनाइएको छ । उहाँको शवलाई त्रिभुवन शिक्षण अस्पताल महाराजगन्जमा राखिएको छ ।

भोजपुर छिनामखुमा वि.सं. २००४ सालमा जन्मिनुभएका रसिकका ‘ओ याङ्जी नाना,’ ‘नुनजस्तो बिल्ने जिन्दगीलाई ढाकरमा बोकेर’, ‘धेरै सम्झे धेरै हुन्छ’, ‘हाम्रो घरबाट ट्याम्के डाँडा’, ‘ओ शून्यता’, ‘घरबेटी नानी आँगनीमा देऊ न मलाई बास’, ‘नखेल्नु जुवा र तास’, ‘रातो भाले क्वाँया क्वाँया’ हरू कालजयी गीत हुन् ।

यस्तै ‘क्षितिजलाई छुन खोज्दा (कथासंग्रह), ‘रसिकका गीतहरू’ (गीतसंग्रह), ‘आकाशगंगाको ओतमुनि’ (उपन्यास), ‘दशगजामा उभिएर’, ‘जब सिस्नुहरू टेक्दै हिँडे’, पाँच पुस्तकको ‘पेरुङ्गो’ (संस्मरण) लगायत रसिकका प्रकाशित किताब हुन् ।