नेपाली दूतावास लन्डनले आउँदो फेब्रुअरी १ देखि ३ सम्म स्कटल्यान्डमा घुम्ती सेवा चलाउने

लन्डन । नेपाली दूतावास लन्डनले आउँदो फेब्रुअरी १ देखि ३ तारिखसम्म स्कटल्यान्डमा घुम्ती सेवा सञ्चालन गर्न लागेको जनाएको छ ।

दूतावासबाट प्रदान गरिने कन्सुलर सेवा घरदैलोमा उपलब्ध गराउने उद्देश्यले एवर्डिन, एडिनबरा र ग्लास्गोमा घुम्ती सेवा संचालन गर्न लागिएको नेपाली दूतावासले जनाएको छ । दूतावासले निकालेको सूचनाअनुसार एवर्डिनमा सन् २०२५ फेब्रुअरी १ तारिख शनिबार दिउँसो ४ बजेदेखि साँझसम्म, एडिनबरामा फेब्रुअरी २ तारिख आइतबार बिहान १० देखि दिउँसो ३ बजेसम्म र ग्लास्गोमा फेब्रुअरी ३ तारिख सोमबार १० देखि दिउँसो २ बजेसम्म कन्सुलर सेवा शिविर संचालन हुनेछ ।

कन्सुलर सेवामा सन् २०२६ फेब्रुअरीसम्म बहाल रहेका राहदानीको नवीकरण, अधिकृत वारेसनामा, कागजात प्रमाणीकरण, एकतर्फी यात्रा अनुमतिपत्र, पर्यटक भिसा तथा गैरआवासीय नेपाली परिचयपत्रजस्ता सेवा उपलब्ध हुनेछन् । ती सेवा लिनका लागि आवश्यक पर्ने कागजात, शुल्क र प्रक्रियाबारे दूतावसको वेबसाइटमा उल्लेख गरिएको छ ।

निर्धारित समयमा उपस्थित भइ आवश्यक सेवा सुविधा लिन दूतावासले सम्पूर्ण स्कटल्यान्डवासीलाई आग्रह गरेको छ ।