‘काँडेतार’ लिएर गायिका सत्यकला राई युकेमा 

लण्डन । नेपाली कथानक चलचित्र ‘काँडेतार’ प्रदर्शन गर्न फिल्म लिएर कार्यकारी निर्मात्री गायिका सत्यकला राई अहिले युके आइ पुग्नुभएको छ ।

चलचित्रमा नेपालको राजनीति, ब्यापार र अन्य कुरामा मात्र होइन खुला सीमानाका कारण हुने अपराध, जनताले भोग्नुपर्ने सास्ती, थिचोमिचो, छिमेकी देशको हेपाहा प्रवृति विरुद्ध आत्मरक्षा र देशको अस्मिता रक्षाका लागि सामाजिक संजालमा मात्रै देशभक्तिको हुँकार लाएर होइन, युवाहरु जाग्नु पर्छ र देशको रक्षार्थ उठ्नु पर्छ भन्ने सन्देश दिएको छ ।

माटो, देश, इतिहास अनि जनताको सार्वभौमसत्ता सबैभन्दा महत्वपूर्ण हो, सिमानामा भइरहेको हिंसा, लुटपाट र हस्तक्षेप कति सहने ? देशको इज्जत नागरिकको इज्जत र समाजको सुरक्षा, देशमा सबैको अस्तित्वभन्दा ठूलो केही छैन भन्ने मूल संदेश बोकेको फिल्मको नेतादेखि चलचित्रकर्मी, पत्रकार, बुद्दिजीवी र देशभक्तहरुले सराहना गर्दै अत्यन्तै राम्रो प्रतिकृया दिए पनि फिल्मले चर्चा पाए जसरी सहज तरिकाले फिल्म चल्ने वातावरण भने मिलेन ।

चलचित्रले आफ्नो अस्मितामाथि धावा बोल्ने चाहे जो होस् त्यस विरुद्ध उभिन आँट गर्न जागरुक बनाउने र सिमानामा काँडेतार लगाएर देशको सुरक्षा गर्नु पर्ने कथा बोकेकै कारण सेन्सरदेखि प्रदर्शनसम्मै अनेक समस्या र विवादको घेराबन्दीका कारण नायक तथा निर्देशक नवल खड्काले चलचित्र चलिरहेकै अवस्थामा प्रदर्शन रोकेर हलबाट उतारेका थिए ।

चेली माइती इन्टरटेइनमेन्ट र न्यु होराइजनको सहकार्यमा ‘काँडेतार’ युकेमा सेप्टेम्बर १५ तारिख आइबार अल्डरसटको एम्पायर हलमा दिउँसो १ बजे पहिलो शो हुनेछ ।

सोही दिन दिउँसो ४:३० बजे दोश्रो शो गरेर युकेका विभिन्न स्थानमा ‘काँडेतार’ कार्यकारी निर्मात्री र सहनिर्माताहरुको उपस्थितिमा प्रदर्शन हुनेछ ।

सेन्सर गरेर आफ्नो चलचित्रको मर्म नै धरापमा पारेको र प्रदर्शनका क्रममा पनि अनेक बाधा ब्यबधानका कारण प्रदर्शन रोक्न बाध्य पारिएकाले दर्शकदीर्घामा आफैँले फिल्म पुर्याएर प्रदर्शन गर्न, सकेसम्म प्रयास गर्ने कुरा नायक तथा निर्देशक नवल खड्काले प्रष्ट पारिसक्नु भएको छ ।

माकिको राई, उज्वल केसी, नाडिया खड्का, शानिया खड्का र रोमियन लिम्बूको निर्माण, निर्देशक नवल खड्का, कलाकारहरूमा नवल खड्का, सुरविना कार्की, रेबिका गुरुङ, मुरलीधर, रोमियन लिम्बूलगायत अन्य रहेका छन ।

चलचित्र बेलायतमा भब्य सफल तरिकाले चलोस् र दर्शकहरुको मन जित्न सफल होस् शुभकामना ।

आफ्नो नजिक प्रदर्शन हुँदा फिल्म हेरेर फिल्मलाई नेपालमा चल्न नदिइनुका कारण केलाउनु होला ।

छिमेकीको थिचोमिचो कतिसम्म सहनु पर्ने हो ? कि सिमानामा काँडेतार नै लगाएर बस्नु पर्ने हो फिल्म हेरेपछि निर्णय गर्ने जिम्मा तपाईं दर्शकहरुलाई नै ।