ब्राजिलमा विमान दुर्घटना, ५७ जना यात्रु र ४ चालक दलका सदस्यको मृत्यु

ब्राजिल । ब्राजिलको साओ पाउलो राज्यमा शुक्रबार विमान दुर्घटना हुँदा ६१ जनाको मृत्यु भएको एयरलाइन्सले जनाएको छ ।

दक्षिणी राज्य परानाको क्यास्कावेलबाट साओ पाउलो सहरका लागि उडेको ५७ जना यात्रु र ४ चालक दलका सदस्य सवार भोपास एयरलाइन्सद्वारा सञ्चालित एटीआर ७२–५०० विमान भिन्हेडो सहरमा दुर्घटना भएको हो । स्थानीय सञ्चारमाध्यमले प्रसारण गरेको तस्बिरमा उक्त जहाज आकाशमा चक्कर लगाउँदै खसेको र दुर्घटनास्थलबाट धुवाँको मुस्लो उडेको देखिन्छ ।

पीडितको शव पहिचान प्रक्रिया सुरु भइसकेको साओ पाउलो राज्यका गभर्नर टारसिसियो डे फ्रिटासले बताएका अन्तर्राष्ट्रिय सञ्चारमाध्यमले जनाएका छन् ।

ब्राजिलका राष्ट्रपति लुला दा सिल्भाले यस घटनाप्रति दुख व्यक्त गर्दै राज्यमा तीन दिन शोकको घोषणा गर्नुभएको छ । ब्राजिलको सेनिपा उड्डयन दुर्घटना एजेन्सीले यस घटनाको अनुसन्धान सुरु गरेको छ ।