पोर्चुगलमा आप्रवासीलाई कडाइ गरिने

लण्डन । युरोपेली युनियनबाहिरका आप्रवासीहरुका लागि उदार मानिएको पोर्चुगलमा आप्रवासीप्रति कडाइ गरिने भएको छ ।
पोचुगलका प्रधानमन्त्री लुइस मोन्टेनेग्रोले सोमबार सम्बोधन गर्दै पोर्चुगलको ढोका खुला राख्न नसकिने बताएका हुन् ।
उनका अनुसार अब युरोपेली युनियनबाहिरका मानिसहरुलाई पर्यटक भिसामा पोर्चुगल आएर आवासीय भिसाका लागि आवेदन दिन बन्द गरिनेछ । हाल सो प्रावधानबाट आवेदन गरेका करिब ४ लाख आवेदकहरुको निवेदन विचाराधीन रहेको छ र सोको चाँडो निर्णयका लागि छुट्टै संयन्त्र बनाइएको र कर्मचारी थपिएको पनि उनले बताएका छन् ।
पोर्चुगलमा यसअघि युरोपेली मुलुकबाहिरका आप्रवासीलाई पोर्चुगलमा जागिर नभए पनि एक वर्ष सोसल सेक्युरिटी शुल्क तिरेपछि आवासीय अधिकारका लागि आवेदन गर्न पाउने व्यवस्था थियो ।
सो प्रावधानको खारेजीपछि अब आप्रवासीहरुले पोर्चुगल प्रवेशगर्नु अघि नै जागिर पाएको कागजात पेश गर्नुपर्नेछ । दक्षता हासिल गरेकाहरु, विद्यार्थीहरु र पोर्चुगिच भाषा वक्ताहरुलाई अब पोर्चुगलमा प्रवेश गर्न प्राथमिकता दिइने पनि बताएको छ ।
सरकारको यो योजनालाई दक्षिणपन्थीहरुले पर्याप्त नभएको प्रतिक्रिया दिएका छन् भने उदारवादीहरुले यसले आप्रवासीहरुलाई अमानवीय अवस्थामा धकेल्न सक्ने बताएका छन् ।
पोर्चुगलमा ८ लाख आप्रवासी रहेका अनुमान छ ।