बेलायतमा आर्थिक मन्दी हट्यो

लण्डन । गतवर्षको अन्त्यमा अप्रत्याशित रुपमा आर्थिक मन्दीमा परेको बेलायतको अर्थतन्त्र नयाँ वर्षको पहिलो तीन महिनामै मन्दीबाट बाहिर निस्किएको छ ।
बेलायतको राष्ट्रिय तथ्यांक कार्यालय (ओएनएस) ले शुक्रबार बिहान सार्वजनिक गरेको आँकडाअनुसार बेलायतको अर्थतन्त्रमा यस वर्षको पहिलो तीन महिनामा निक्कै सुधार भएको पाइएको छ ।
जनवरीदेखि मार्चसम्मको पहिलो त्रैमासिकमा बेलायतको अर्थतन्त्र ०.६ प्रतिशतले बढेको छ । यो विश्लेषकहरुको अनुमानभन्दा पनि बढी हो । विश्लेषकहरुले सो अवधिमा बेलायतको अर्थतन्त्र ०.४ प्रतिशत मात्र रहने भविष्यवाणी गरेका थिए । यस वृद्धिलाई सन् २०२१ यताकै उच्च वृद्धि पनि मानिएको छ । यस वृद्धिसँगै बेलायतको अर्थतन्त्र अतिविकसित राष्ट्रहरु (जी सेभेन) को तहमा पुगेको छ ।
ओएनएसका अनुसार यस त्रैमासिकमा अर्थतन्त्र सुधार हुनुमा सेवा क्षेत्र, खुद्रा व्यापार, यातायात, स्वास्थ्य, कार उत्पादन लगायतका क्षेत्रहरुको योगदान रहेको छ तर निर्माण क्षेत्रमा भने अझै सुधार आउन नसकेको बताइएको छ ।
ओएनएसका अर्थशास्त्रीहरुले बेलायतका अर्थतन्त्रले लय पक्रेको र आगामी दिनमा अझै बढ्ने आशा व्यक्त गरेका छन् । तर यो सालको वृद्धि सुस्त गतिको हुने बताइएको छ । उच्च मुद्रास्फिति र उच्च ब्याजदरका कारण वृद्धि द्रुत नहुने भएको हो ।
बैँक अफ इंग्ल्याण्डले यो साल बेलायतको आर्थिक वृद्धिदर ०.५ प्रतिशत रहने विहीबार मात्र आँकलन गरेको छ ।