एमसिसी कार्यान्वयनमा आएकै साता आइपुगे अमेरिकी सांसद

काठमाडौँ । यसैसाता नेपालमा मिलिनियम च्यालेन्ज कर्पोरेसन (एमसिसी) लागू भयो । जसका लागि एमसिसीका अधिकारीहरू नेपाल आएका थिए । आजै अर्का अमेरिकी सांसद नेपाल आइपुगेका छन् ।
उनले प्रधानमन्त्री पुष्पकमल दाहाल ‘प्रचण्ड’ सँग आजै बालुवाटारमा भेट गरेका छन् ।
अमेरिकाको परराष्ट्र सम्बन्ध समिति र राज्य तथा वैदेशिक कार्य–सञ्चालनसम्बन्धी विनियोजन उपसमितिका सदस्य समेत रहेका सिनेटर क्रिस भन होलेनसितको भेटमा दुई देशको आपसी हित र सहकार्यका विषयमा छलफल भएको जनाइएको छ ।
आफ्नो भ्रमणका क्रममा होलेनले अमेरिका र नेपालबीचको राजनीतिक र व्यावसायिक सम्बन्धलाई थप मजबुत बनाउन विभिन्न भेटवार्ता गर्नुहुने यहाँस्थित अमेरिकी दूतावासले जनाएको छ ।
भ्रमणका क्रममा उहाँले नेपालका सरकारी अधिकारी, युवा नेता, सांसद र उद्यमीहरूसँग भेटघाट गर्नुहुने र नेपालको स्वास्थ्य र पूर्वाधारका क्षेत्रमा अमेरिकी सहयोगबारे सम्बन्धित निकायसँग छलफल गर्ने जनाइएको छ ।