मुख्यमन्त्रीमा काँग्रेसका उद्धव थापा पुन: नियुक्त

विराटनगर । कोशी प्रदेशका प्रमुख पर्शुराम खापुङले कोशी प्रदेशको मुख्यमन्त्रीमा नेपाली कांग्रेस प्रदेश संसदीय दलका नेता उद्धव थापालाई आज बेलुका नियुक्त गर्नुभएको छ ।
नेपालको सविधानको धारा १६८ को उपधारा(२) बमोजिम प्रदेश प्रमुख खापुङले उहाँलाई मुख्यमन्त्री पदमा नियुक्त गर्नुभएको हो ।
प्रदेश प्रमुख खापुङले नवनियुक्त मुख्यमन्त्री थापालाई बधाई तथा शुभकामना पनि दिनुभएको छ भने भोलि बिहान १०:३० बजे मुख्यमन्त्रीले शपथ लिनु हुने कार्यक्रम तय भएको जनाइएको छ ।
यसअघि पनि थापा मुख्यमन्त्री थिए तर सभामुखले उनलाई मत दिएकोमा सर्वोच्च अदालतले सभामुखले त्यसरी मत दिन नपाउने भन्दै थापाको नियुक्ति बदर गरेको थियो । कोशी प्रदेशको सभासद संख्यामा कसैको बहुमत नपुग्ने भएपछि सभामुख बाबुराम गौतमले सभामुख पदबाट राजिनामा गरी थापालाई समर्थन गरेका हुन् ।