नेपाली सिनेमा “जारी” को ग्रान्ड प्रिमियर बेलायतमा हुने

लण्डन । नेपाली चलचित्र जारीको बेलायतमा पनि प्रिमियर शो हुने भएको छ ।
अप्रिल २२ तारिखको दिन प्रिन्सेस हल, अल्डरशटमा गोर्खा वरियर्स ईभेन्टस्द्वारा सो चलचित्रको प्रिमियर सो आयोजना गरिएको हो ।
प्रिमियरमा “जारी” चलचित्रको टीम उपस्थित हुने जानकारी आयोजक गोर्खा वरियर्स ईभेन्टस्का सन्ञ्चालकहरु अल्बिन र पिटरले जानकारी दिए ।
गोर्खा ईभेन्टस्को पनि यस फिल्ममा केही हिस्सा लगानी भएकोले ईभेन्टस् सञ्चालक अल्बिन नेपाल पुगेर फिल्मको गहिरो अनुसन्धान गरी सिनेमाको गीत सुटिङ्को अवलोकन समेत गरेर बेलायत फर्केका हुन् । वरियर्स ईभेन्टस्को टीमसँग सल्लाह गरेर ग्रान्ड प्रिमियर गर्ने योजना तय गरिएको उनले बताए ।
यस “जारी” चलचित्रको कथा लेखन तथा निर्देशक झाँक्री बुढा पात्रबाट परिचित उपेन्द्र सुब्बाले गरेका छन् ।
“जारी” चलचित्रमा पूर्वको किरात लिम्बुहरुको संस्कार संस्कृतिहरूलाई उजागर गरेर बनाइएको संकेत सिनेमाको टिजर र ट्रेलरहरुले झल्काउँछ । समग्रमा कथावस्तु र छायाङ्कन अरु सिनेमाहरु भन्दा फरक भएको निर्देशक उपेन्द्र सुब्बाले टेलिफोनमार्फत जानकारी दिए ।
प्रिमियरमा ”जारी” टिमका सुपरस्टार दयाहाङ् राई, हिरोइन मिरुना मगर, बिजय बराल र उपेन्द्र सुब्बा उपस्थित हुने पक्का भएको जानकारी गोर्खा वरियर्स ईभेन्टस्का अर्का सदस्य पिटरले जानकारी गराउँदै यस चलचित्रको टिजर र ट्रेलर टिकटक र यूट्यूबमा राखिएकोलाई लाखौंले हेरिसकेकोले गर्दा सुपरहिट हुने आत्मविश्वास समेत राखे ।