निर्देशनमा हात हाल्दै नायिका बेनिशा हमाल

काठमाडौँ । चलचित्र ‘स्वर’मार्फत अभिनयको सुरुआत गर्नुभएकी अभिनेत्री बेनिशा हमाल निर्देशक बन्नुभएको छ ।
उहाँको निर्देशन रहेको छोटो चलचित्र ‘मिसिङ ब्राइड’ओटीटी प्लेटफर्म सिनेमा घरएपमार्फत सार्वजनिक भएको छ । विवाह र बेहुलीलाई आधार बनाएर तयार गरिएको छोटो चलचित्रमा वर्षा राउत र विवेक सिंह ठकुरीले अभिनय गर्नुभएको हो ।
अभिनयमार्फत प्राप्त गरेको अनुभव र अध्ययनको आधारमा निर्देशनको सुरूआत गरेको अभिनेत्री हमालले जानकारी दिनुभयो । “निर्देशनमा मात्र केन्द्रित हुनुपर्ने भएकाले अभिनय गरिनँ । यो मेरो सुरूआत हो”,उहाँले भन्नुभयो, “आगामी दिनमा कथावस्तु र टीम मिलेसम्म म निर्देशनलाई निरन्तरता दिन्छु । निर्देशन गरेपछि दुवै पक्षलाई अझै बुझ्न पाएँ ।”
यसमा अभिनेत्री हमालकै लेखन, शिवराम श्रेष्ठको छायाङ्कन, प्रविन श्रेष्ठको सम्पादन रहेको छ । १४ चलचित्रमा अभिनय गरिसक्नुभएकी अभिनेत्री हमाल अभिनित चलचित्र ‘छक्का पञ्जा ४’अहिले प्रदर्शनरत छ ।