लण्डन । नेपाली कामदारलाई बेलायतमा काम खोजिदिएवापत पैसा लिएको आरोपमा एक नेपाली रिक्रुटमेन्ट एजेन्सीको लाइसेन्स खारेज गरिएको छ ।
बेलायतमा कामदार ल्याउन लाइसेन्स जारी गर्ने निकाय ग्याङमास्टर एण्ड लेबर अब्युज अथोरिटीले सोमबार एक विज्ञप्ति जारी गर्दै अडेप्ट एण्ड अजाइल पिएलसीको लाइसेन्स तत्काल खारेज गर्ने निर्णय गरिएको बताएको छ ।
यसअघि डिसेम्बर महिनामा सो एजेन्सीलाई अथोरिटीले १८ महिनाका लागि प्रतिबन्ध लगाउने निर्णय गरेको थियो र अथोरिटीको सो निर्णयलाई बेलायतको डनकास्टर म्याजिष्ट्रेट कोर्टले अनुमति दिएको थियो ।
अथोरिटीका अनुसार नेपाली कम्पनी अडेप्ट र अजाइलका निर्देशकद्वय रेशम गुरुङ र प्रविन रिमाल अथोरिटीले तय गरेको मापदण्ड पूरा गर्न असमर्थ भएकाले लाइसेन्स खोसिएको हो ।
लाइसेन्स खोसिएपछि सो कम्पनीले अथोरिटीले नियमन गर्ने क्षेत्रमा कामदार पठाउन पाउने छैन । जसमा बेलायतको कृषि क्षेत्र, वागवानी, समुद्रमा माछा मार्ने, प्याकेजिङ र प्रोसेसिङ क्षेत्र पर्दछन् ।
६५ वर्षीय गुरुङ पूर्व गोरखा सैनिक हुन् र उनको स्थायी ठेगाना बेलायतमै रहेको छ भने ५६ वर्षीय रिमाल नेपालमा बसोबास गर्ने बताइएको छ ।
अथोरिटीका अनुसन्धान अधिकृतहरूले सो एजेन्सीबाट बेलायत आएका १०० जनाभन्दा बढी कामदारहरूसित बयान लिँदा सो एजेन्सीले काम खोजिदिए वापत १२ देखि १३ हजार पाउण्डसम्म उठाएको तथ्य बाहिर आएको थियो । उनीहरू सो पैसा सीधै गुरुङलाई वा उनको आफन्त वा एजेन्सीका कर्मचारीलाई बुझाएको बताएका थिए ।
बेलायतमा काम खोजिदिएवापत शुल्क लिनु गैरकानुनी मानिन्छ ।
गुरुङ र रिमालले कामदारहरुलाई शुल्क तिरेको बारेमा कसैलाई नभन्न र भनेमा कामबाट हटाइने र नेपाल फिर्ता पठाइने डर देखाएको पाइएको पनि अथोरिटीले जनाएको छ ।
अथोरिटीको लाइसेन्स खारेज गर्ने निर्णयका विरुद्ध रिमाल र गुरुङले पुनरावेदन दिएनन् ।
अथोरिटीका नियमन प्रमुख निकोला रेले अनुसन्धानबाट नेपालबाट ल्याइएका कामदारहरूमाथि शोषण गरिएको र काम खोजिदिएवापत चर्को शुल्क लिइएको पाइएको बताइन् । उनले अथोरिटीबाट लाइसेन्स लिएकाहरूलाई काम खोजिदएवापत शुल्क लिन पाइँदैन भनेर प्रष्ट रूपमा भनिएको तर चर्को शुल्क उठाएर अडेप्ट एण्ड अजाइल एजेन्सीले लाइसेन्सविपरीत कार्य गरेको उल्लेख गरिन् ।
