लण्डन । शेर्पा संघ बेलायतले २१५० औँ ग्याल्पो ल्होसार मनाएको छ ।
शनिबार सामुयल कोडी स्पोर्टस सेन्टर फार्नब्रोमा एक कार्यक्रमको आयोजना गरी ल्होसार मनाइएको हो ।
कार्यक्रममा प्रमुख अतिथि नेपाली दुताबास लण्डन बेलायतको उपनियोग प्रमुख श्रीमती रोशन खनाल रहनुभएको थियो । नेपालबाट आउनुभएका धर्मगुरु खेना रिम्पोछे सोनाम वाङ्गेल लामा पनि कार्यक्रममा अतिथिका रूपमा सहभागी हुनुहुन्थ्यो । संघका अध्यक्ष आङदाबा च्याबा शेर्पाको अध्यक्षमा भएको सो कार्यक्रमको संचालन महासचिव रिन्जी लामा शेर्पा र स्वागत मन्तब्य प्रथम उपाध्यक्ष ङवाङ योन्तेन ग्याछो लामा शेर्पले गरेका थिए । कार्यक्रममा बेलायतमा विभिन्न जातीय तथा सामाजिक संघ संस्थाका प्रतिनिधिहरू आमन्त्रित थिए ।
गायकहरू रेवत राई र पाल्देन शेर्पाले कार्यक्रममा विभिन्न गीतहरू गाएर मनोरन्जन दिलाएका थिए भने शेर्पा जातिको विशेष सेब्रु नाच र नेपाली गीतमा नृत्यहरू पनि प्रस्तुत गरिएको थियो । साँस्कृतिक सत्रको संचालन आङदोर्जे शेर्पाले गरेका थिए ।
कार्यक्रममा संस्थाका आजिवन सदस्यहरू, स्नातक तथा स्नातकोत्तर उत्तीर्ण गर्ने किशोर किशोरीहरू, नेपालमा शेर्पा संघको भवन खरिदमा आर्थिक सहयोग गर्ने दाताहरूलाई प्रमुख अतिथि र संस्थाका अध्यक्षले प्रसंशापत्र प्रदान गरेका थिए । संस्थलाई महत्वपूर्ण सहयोग गरेवापत शेर्पा संघ साउथ सेन्ट्रल कमिटीका पूर्व अध्यक्ष सन्त शेर्पालाई सम्मान पत्र दिइएको थियो ।
कार्यक्रममा बेलायतका विभिन्न स्थानमा बसोबासरत शेर्पा समुदायको उपस्थिति रहेको थियो । यस वर्षको कार्यक्रम व्यवस्थापन संयोजन सहकोषाध्यक्ष काजी च्यावा शेर्पाले गरेका थिए ।
