बेलायतको मुद्रास्फिति वर्षको अन्त्यसम्ममा २ प्रतिशतमा झर्नसक्ने

लण्डन । बेलायतको इतिहासमै उच्चविन्दूमा पुगेको मुद्रास्फिति यसै वर्षको अन्त्यसम्ममा दुई प्रतिशतमा झर्नसक्ने अनुमान अर्थविदहरूले गरेका छन् ।

सिटी ग्रुपले बुधबार गरेको पूर्वानुमानअनुसार ग्याँसको मूल्य तीव्रगतिमा घटिरहेकाले अहिले १० प्रतिशतमाथि रहेको मुद्रास्फिति स्वात्तै घट्ने बताइएको छ । उच्च मुद्रास्फिति बेलायतको अहिलेको सबैभन्दा ठूलो चुनौती बनेको छ र प्रधानमन्त्री ऋषि सुनकले आफ्ना पाँच प्राथमिकतामा मुद्रास्फिति आधा घटाउने वाचा गरेका छन् ।

पूर्वानुमानअनुसार आगामी नोभेम्बरसम्ममा मुद्रास्फिति २.३ प्रतिशतमा झर्न सक्नेछ । बैँक अफ इङ्ल्याण्डले भने मुद्रास्फिति ४ प्रतिशतमा झर्ने अनुमान गरेको छ । सिटी ग्रुपका प्रमुख अर्थशास्त्री बेन्जामिन नाबारोले युरोप क्षेत्रमा ग्याँसको मूल्यमा आएको ह्रासका कारण मुद्रास्फितिका बारेमा नयाँ विश्लेषण सार्वजनिक गर्नु परेको बताएका छन् । उनले जुलाइमा नै मुद्रास्फिति ५ प्रतिशतमा झर्ने बताए जबकि गत महिना मात्र अक्टोबरमा मात्र मुद्रास्फिति ५ प्रतिशतमा झर्ने विश्लेषण सार्वजनिक गरिएको थियो ।

नयाँ पूर्वानुमानसँगै घरायसी उपयोगको उर्जाको मूल्य पनि घट्ने सम्भावना छ किनकि ग्याँसको थोक मूल्यमा निरन्तर गिरावट आइसकेको छ । अगष्ट यता ग्याँसको मूल्यमा ८० प्रतिशतले कमी आएको छ । नयाँ मूल्यका कारण यसअघि सरकारले तोकेको प्रति घर वार्षिक ३ हजार २९५ पाउण्ड उर्जाको औसत मूल्य अब २ हजार १६१ पाउण्डमा झर्न सक्ने कोर्नवाल इन्साइटले अनुमान गरेको छ ।