यस्तो हुनेछ राजा चार्ल्स तृतीयको तस्वीर अंकित नोट

लण्डन । बैँक अफ इङ्ल्याण्डले आज (मंगलबार) बेलायतका नयाँ राजा चार्ल्स तृतीयको तस्वीर अंकित बैँक नोटको नमूना सार्वजनिक गरेको छ।

राजा चार्ल्सको तस्वीर अब निस्कासन हुने पाँच, दश, बीस र पचास पाउण्डका नयाँ पोलिमर नोटहरूमा मुद्रित हुने बैँकले जनाएको छ ।

बैकका अनुसार नयाँ नोट सन २०२४ को आधाउधीमा प्रयोगमा आउने छ ।

महारानी एलिजावेथ द्वितियाको निधनपछि नयाँ नोटको नमूना सार्वजनिक गरिएको हो । बैँकले एलिजावेथको तस्वीर अंकित नोटहरू पनि समानान्तर रूपमा बजारमा प्रचलनमा रहिरहने बताएको छ । धेरैले नयाँ नोट निस्कासन पछि पुरानो नोटहरू फिर्ता होला भन्ने लख काटेका थिए । तर बैँकले नयाँ बैँक नोटहरू फाटेका पुराना नोटहरूलाई प्रतिस्थापन गर्न र नोटको मागलाई पूर्ति गर्न मात्र छापिने बताएको छ । साथै वातावरणीय र आर्थिक खर्चलाई ध्यान दिएर पुराना नोटहरू विस्थापन नगरिएको बैँकको भनाइ छ ।

बैँकका गभर्नर आन्ड्रयू बेलीले राजा चार्ल्स तृतीयको तस्वीर अंकित नोट निस्कासन गर्न लागेकोमा खुशी लागेको यो महत्वपूर्ण क्षण भएको बताए । उनले राजा चार्ल्स तृतीय बैँक नोटमा तस्वीर अंकित हुने दोस्रो राजपरिवार भएको बताए ।

सबै तस्वीरहरू: बैँक अफ इङ्ल्याण्ड