बोरिस जोन्सनले हापे भावी प्रधानमन्त्रीको दौड

लण्डन । बेलायतका पूर्व प्रधानमन्त्री बोरिस जोन्सनले बेलायतको भावी प्रधानमन्त्रीको प्रतिस्पर्धा त्यागेका छन् ।

आइतबार बेलुका एक बक्तब्य जारी गर्दै उनले जबसम्म पार्टीलाई संसदमा एकवद्ध गराउन सकिँदैन तबसम्म राम्रोसँग सरकार चलाउन सम्भव नहुने बताएका छन् । यसका लागि पार्टी नेतृत्वका लागि प्रतिस्पर्धामा रहेका ऋषि सुनक र पेन्नी मोर्डन्टसित छलफल गरी राष्ट्रिय हितका लागि सहकार्य गर्न सकिन्छ कि भनेर छलफल गरेको उनले जानकारी दिएका छन् । तर दुर्भाग्यवश सहकार्य गर्न नसकिएका कारण आफूले भावी नेताका लागि सोमबार मनोनयन नगर्ने निर्णय गरेको उनले बताएका छन् ।

बक्तब्यमा उनले आफूले गत निर्वाचनमा कन्जरभेटिभ पार्टीलाई पूर्ण बहुमत दिलाएको र आगामी चुनावमा पुन बहुमत दिलाउनेमा पूर्ण विश्वस्त रहेको बताएका छन् । पार्टीको आगामी नेताका लागि मनोनयन गर्न आफूले १०२ जना सांसदको समर्थन पाइसकेको पनि उनले उल्लेख गरेका छन् । आफूले चाहेको भए आउने शुक्रबार नै पुन: प्रधानमन्त्री बन्न सक्ने दाबी पनि उनको छ ।

बेलायती प्रधानमन्त्री लिज ट्रसले शुक्रबार राजिनामा दिएपछि केही सांसदहरुले पुन बोरिस जोन्सनलाई नै प्रधानमन्त्री बनाउनु पर्ने निस्कर्षका साथ उनलाई क्यारेबियन मुलुकमा बिदा मनाइरहेको अवस्थाबाट बेलायत झिकाएका थिए । शनिबार बेलायत आएपछि उनले सार्वजनिक रुपमा केही नबोली सांसदहरुलाई आफूलाई समर्थन गर्न फोन गरेका थिए भने शनिबार नै ऋषि सुनक र आइतबार पेन्नी मोर्डन्टलाई भेटेका थिए ।

जोन्सनले प्रतिस्पर्धाबाट खुट्टा झिकेपछि अब ऋषि सुनक र पेन्नी मोर्डन्टबीच प्रतिस्पर्धा हुने हो वा सोमबार नै ऋषि सुनक सर्वसम्मत नेता चुनिने हुन् त्यसको लागि सोमबार दिउँसो २ बजेसम्म कुर्नैपर्ने हुन्छ ।