गेसोद्वारा प्रधानमन्त्री देउवासित भेट, वार्ता बारे छलफल

लण्डन । गोरखा भूतपूर्व सैनिक संघ (गेसो) ले नेपालका प्रधानमन्त्री शेरबहादुर देउवासित भेट गरी नेपाल र बेलायतबीच गोरखा भूतपूर्व सैनिकहरुका बारेमा हुन लागेको द्विपक्षीय वार्ताका बारेमा छलफल गरेको छ ।
गेसो सभापति कृष्णकुमार राईको संयोजकत्वमा गएको प्रतिनिधिमण्डल र प्रधानमन्त्री देउवाबीचको बालुवाटारमा भएको भेटमा नेकपा माओवादी केन्द्रका अध्यक्ष पुष्पकमल दाहाल प्रचण्ड पनि उपस्थित हुनुहुन्थ्यो ।
भेटमा गेसोको टोलीले नेपाल र बेलायतबीच हुन गइरहेको वार्तामा के कस्तो तयारी भइरहेको छ भन्ने बारेमा प्रधानमन्त्री देउवासित जिज्ञासा राखेको थियो । प्रधानमन्त्री देउवाले वार्ताको मिति तोकिन नसकिएको र सम्भवत जुलाईमा वार्ता शुरु हुनसक्ने सम्भावना रहेको बताएको सभापति राईले जानकारी दिनुभयो । यदि जुलाईमा वार्ता शुरु नभए पनि नेपाल र बेलायतबीच वार्ता भएरै छाड्नेमा आफू आशावादी रहेको पनि प्रधानमन्त्री देउवाले बताएका थिए ।
गेसोको प्रतिनिधिमण्डलले वार्ताका बारेमा सरोकारवाला आफूहरुसित परराष्ट्र मन्त्रालय र बेलायतस्थित नेपाली दुताबासले छलफल नगरेको बारेमा पनि प्रधानमन्त्रीको ध्यानाकर्षण गराएको थियो । उनीहरुले सरोकारवालाहरुसित सघन छलफल भएमा वार्तालाई गोरखाहरु र नेपालको पक्षमा बनाउन सजिलो हुने तर्क गरेका थिए । सोको जवाफमा प्रधानमन्त्री देउवाले वार्ता टोलीको संयोजकलाई सरोकारवालाहरुसित छलफल गर्न निर्देशन दिइसकेको बताएका थिए ।
गेसोले गोरखाहरुका सन्तानलाई वंशजको आधारमा नागरिकताको निरन्तरका बारेमा पनि प्रधानमन्त्रीसित माग गरेका थिए । प्रधानमन्त्री देउवाले अहिले नागरिकताका बारेमा छलफल चलिरहेको र आफ्ना नागरिकका छोराछोरीको नागरिकताको अधिकार कसरी संरक्षण गर्ने बारेमा आफूहरु चिन्तित रहेको बताएको सभापति राईले जानकारी दिए ।

समग्रमा प्रधानमन्त्रीसितको भेट सकारात्मक रहेका गेसो सभापति राईले बताए ।

प्रतिक्रिया

सम्बन्धित सामाग्री