गोरखाबारे वार्ता गर्न नेपाल सरकारले बनायो वार्ता टोली

लण्डन ।नेपाल सरकारले गोरखा भूतपूर्व सैनिकका समस्याका बारेमा बेलायत सरकारसित वार्ता गर्न समिति बनाएको छ ।

मन्त्रिपरषद्को हालै बसेको बैठकले सो निर्णय गरेको हो ।

सरकारका प्रवक्ता, सूचना तथा सन्चार प्रविधि मन्त्री ज्ञानेन्द्रबहादुर कार्कीले बुधवार सार्वजनिक गर्नुभएको नेपाल सरकारका निर्णयहरूमा बेलायतसित वार्ताको लागि राजदुतको नेतृत्वमा वार्ताटोली गठन गर्ने उल्लेख छ ।

‘भूतपूर्व ब्रिटिस गोर्खा सैनिकहरुका सम्बोधन हुन बाँकी मागहरुबारे संयुक्त अधिराज्य सरकारसँग वार्ता गर्न संयुक्त अधिराज्यका लागि नेपाली राजदूतको नेतृत्वमा नेपाली प्रतिनिधिमण्डल गठन गर्ने’ मन्त्री परिषदको निर्णयमा भनिएको छ ।

पूर्व गोरखाहरूको समेत सहभागितामा हुने सो वार्ता टोलीका अन्य सदस्यहरूका बारेमा केही बताइएको छैन ।

परराष्ट्र मन्त्रालयले वार्तामा भाग लिन तीन जनाको नाम मागे पनि गोरखाहरू मेजर जुदबहादुर गुरूंगको नाममा मात्र सर्वसम्मतिमा पुगेका छन् ।