स्पेनी राजा फिलिप छैटौँ कोभिड सङ्क्रमित

म्याड्रिड। स्पेनका राजा फिलिप छैठौंलाई कोभिड–१९ सङ्क्रमण पुष्टि भएको स्पेनी दरबार स्रोतले जानकारी गराएको छ । उहाँलाई कोभिड सङ्क्रमण पुष्टि भएपनि सामान्य लक्षणहरू मात्र महशुस भएको बुधबार बताइएको छ ।

सङ्क्रमणका हल्का लक्षणहरू देखिएपछि ५४–वर्षीय राजाले मङ्गलबार कोभिड सङ्क्रमण परीक्षण गराउनुभएको थियो । उहाँ एक हप्तासम्म अलग्गै बस्नुहुने र यस अवधिमा आफ्नो आवासबाट ‘आफ्ना संस्थागत क्रियाकलापहरू’ गर्नुहुने बताइएको छ ।

स्पेनी नरेशले बुधबार नै म्याड्रिडमा बोस्नियाली राष्ट्रपतिका क्रोएसियाली प्रतिनिधिजेल्ज्को कोमसिकसँग भेटवार्ता गर्नुभएको थियो ।

राजा फिलिपले २०२१ मे महिनामा कोभिड–१९ विरूद्धको पहिलो मात्रा खोप लगाउनुभएको दरबारका अधिकारीले बताएका छन् । एएफपीले उहाँले अन्य खोप लगाउनुभयो वा भएन भन्ने बारे फोनमार्फत् सोधिएको प्रश्नमा ती अधिकारीले थप खोपबारे कुरा गर्न चाहनुभएन ।

नरेशलाई कोभिडको सङ्क्रमणपछि सामान्य लक्षण देखिएपनि रानी लेटिजिया र कान्छी छोरी सोफियामा भने लक्षणहरू देखिएका छैनन् । उहाँहरूले सामान्य रूपमा आफ्ना क्रियाकलापलाई जारी राख्नुहुनेछ । उहाँहरूकी जेठी छोरी लियोनरले भने वेल्सस्थित एक आवासीय विद्यालयमा पढिरहनुभएको छ ।

कोभिड–१९ संक्रमण दर घटेको र अस्पतालहरूमा कोभिड सङ्क्रमित विरामीको चाप कम भएपछि स्पेनले बिहीबारदेखि घरबाहिर हिँड्दा अनुहारमा मास्क लगाउनुपर्ने नियमलाई अन्त्य गर्दैछ । यो उपायले अत्यधिक सङ्क्रामक ओमिक्रोन भेरिएन्टद्वारा उत्प्रेरित संक्रमणहरूको वृद्धिबीच गत डिसेम्बरमा लिएको कोभिड नियन्त्रणको नियमलाई अन्त्य गर्नेछ । स्पेनमा सार्वजनिक यातायात लगायतका भित्री सार्वजनिक स्थलसमेतमा मास्क प्रयोग गर्नु अनिवार्य गरिएको छ ।

अहिलेसम्म स्पेनमा एक करोड चार लाखभन्दा बढी सङ्क्रमित भएका र ९५ हजारको मृत्यु भइसकेको छ ।