लकडाउनमा बेलायती प्रधानमन्त्रीको कार्यालयमा १६ वटा पार्टी

लण्डन । कोरोना भाइरस नियन्त्रणका लागि बेलायतमा राष्ट्रव्यापी लकडाउन चलिरहँदा बेलायती प्रधानमन्त्रीको कार्यालयमा भने १६ वटा पार्टी आयोजना भएको पाइएको छ ।

प्रधानमन्त्री बोरिस जोन्सनले आफ्नो कार्यालयमा त्यस्ता पार्टीहरु आयोजना गरिएको समाचार सार्वजनिक भएपछि त्यसबारे छानविन गर्न सरकारका सचिव सु ग्रेलाई छानविनको जिम्मा दिएका थिए । ग्रेले आज प्रधानमन्त्री जोन्सनलाई बुझाएको बहुप्रतीक्षीत प्रतिवेदनको संशोधित  प्रतिमा सो कुरा उल्लेख छ ।

सन् २०२० मे १५ देखि १६ अप्रिल २०२१ सम्ममा प्रधानमन्त्री कार्यालय मातहतका विभिन्न स्थानमा त्यस्ता पार्टीहरु आयोजना भएको प्रतिवेदनमा उल्लेख छ । जसमा प्रधानमन्त्री जोन्सनको जन्मदिन, उनका विशेष सल्लाहकार डोमिनिक कमिङको बहिर्गमन, क्रिसमस, प्रधानमन्त्रीका कार्यालयका विभिन्न कर्मचारीहरुको विभिन्न समयमा विदाईका अवसरमा त्यस्ता पार्टीहरु आयोजना भएको बताइएको छ ।

तीमध्ये १२ वटा पार्टीहरुमा लण्डन प्रहरीले अनुसन्धान गरिररहेको बताइएको छ ।

आफूले चाहेजस्तो प्रतिवेदन प्रहरी अनुसन्धानका कारण दिन नसकेको सचिव ग्रेले बताएकी छिन् भने कसैलाई व्यक्तिगतरुपमा दोषारोपण नगरी प्रधानमन्त्री कार्यालयअन्तर्गतका विभिन्न विभागीय नेतृत्वको असफलता र विवेक प्रयोग गर्न नसकेको निस्कर्ष निकालेकी छिन् ।

‘कतिपय पार्टीहरु आयोजनाका लागि अनुमति दिनै हुँदैनथ्यो’ उनले भनेकी छिन् ।

उनले सो रिपोर्ट तयार गर्नका लागि ७० जनासित अन्तर्वार्ता गरेकी थिइन् ।

सो प्रतिवेदनले सत्तारुढ टोरी पार्टी र बेलायतको राजनीतिमा के कस्तो प्रभाव पार्छ आगामी दिनमा खुल्दै जानेछ