इजरायल पुगेका नेपाली श्रमिकलाई दूतावासको स्वागत

काठमाडौँ। रोजगारीका लागि इजरायल पुगेका नेपाली श्रमिकलाई तेलअभिवस्थित नेपाली दूतावासले स्वागत गरेको छ । नेपाली श्रमिकलाई इजरायलको स्वास्थ्य मन्त्रलाय, जनसङ्ख्या तथा अध्यागमन प्राधिकरण (पिआइविए) र दूतावासको टोलीले वेन गुरिओन अन्तर्राष्ट्रिय विमानस्थलमा स्वागत गरेको थियो ।
दूतावासका तृतीय सचिव प्रदीपसागर गिरी नेपाली श्रमिकको स्वागतका लागि विमानस्थल पुग्नुभएको थियो । इजरायलको नर्सिङ क्षेत्रमा सहायक कामदारका रूपमा पहिलो चरणमा ९९ नेपाली श्रमिक बुधबार साँझ त्यसतर्फ प्रस्थान गरेका थिए । उनीहरुलाई त्रिभुवन अन्तर्राष्ट्रिय विमानस्थलमा श्रम, रोजगार तथा सामाजिक सुरक्षामन्त्री कृष्ण्कुमार श्रेष्ठ, नेपालका लागि इजरायली राजदूत होनान गोदारलगायत मन्त्रालयका उच्चअधिकारीले बिदाइ गर्नुभएको थियो ।
एक दशक लामो प्रयासपछि पुनः नेपाली श्रमिक रोजगारीका लागि इजरायल पुगेका हुन् । केही वर्षअघिसम्म निजी क्षेत्रमार्फत रोजगारीका लागि नेपालीहरु इजरायल पुग्ने गरेकामा उक्त प्रक्रिया रोकिएपछि सरकारीस्तर (जिटुजी) बाट नेपाली श्रमिक लैजाने सरकारको प्रयासले सार्थकता पाएको हो ।
नेपाली श्रमिकलाई इजरायली श्रम बजारमा सरकारीस्तरबाट प्रवेश दिलाउन त्यहाँस्थित नेपाली दूतावासले निकै ठूलो पहलकदमी लिएको थियो । दूतावासको निरन्तरको प्रयासपछि गत वर्ष नेपाल र इजरायलबीच ‘इजरायलको विशिष्ट श्रम बजारमा नेपाली कामदारको अस्थायी रोजगारीसम्बन्धी सम्झौता’मा हस्ताक्षर भएको थियो ।
इजरायलको नर्सिङ क्षेत्रमा नेपालबाट सहायक कामदार ल्याउनेसम्बन्धी ‘प्रोटोकल’ मा हस्ताक्षर भएपछि पहिलो चरणमा छनोट गरिएका एक हजार बढी नेपाली रोजगारीका लागि इजरायल जाने क्रम शुरु भएको मन्त्रालयले जनाएको छ । तीमध्ये ६३ महिला र ३६ पुरुष गरी ९९ नेपाली श्रमिक बुधबार राति इजरायल प्रस्थान गरेका हुन् ।
वैदेशिक रोजगार विभागले गत कात्तिकमा ५०० र मङ्सिरमा ६७५ श्रमिकको नामावली रोजगार सम्झौताका लागि इजरायल पठाएको थियो । छनोटमा परेका एक हजार १७५ मध्ये ८२१ महिला र ३५४ पुरुषको अन्तिम नामावली प्रकाशित भएको छ । नेपाल सरकार र इजरायल सरकारबीच २०७७ असोज १४ गते श्रम सम्झौता भएको थियो ।
छनोटका क्रममा रहेका अन्य नेपाली श्रमिकको करार सम्झौतामा हस्ताक्षर, कोरोनाविरुद्धको खोप लगाउने, प्रवेशाज्ञा र पूर्वप्रस्थान अभिमुखीकरणको काम भइरहेको श्रम मन्त्रालयले जनाएको छ । दोस्रो चरणमा यही माघको तेस्रो साता केही नेपाली श्रमिक इजरायल जानेछन् । छनोट भएका अन्य नेपाली श्रमिक क्रमिकरूपमा त्यसतर्फ प्रस्थान गर्नेछन् ।
नेपाली श्रमिकले इजरायलमा मासिक करिब रु दुई लाख पारिश्रमिक पाउनेछन् । उनीहरुले इजरायली श्रमिकसरहको पारिश्रमिक, बिदा र स्वास्थ्योपचार सुविधा प्राप्त गर्ने काठमाडौँस्थित इजरायली दूतावासले जनाएको छ ।