शुक्रबार, माघ ७ २०७८ | Fri, January 21, 2022
नेपालको समय: ०२:१३ | UK Time: 20:28

शहीद स्मारक लिग नखेलाउने १७ रेफ्रीको निर्णय

वीनेपाली
२०७८ मंसिर १६ गते १८:०३

काठमाडौं । अखिल नेपाल फुटबल संघ (एन्फा)को आयोजनामा जारी सहिद स्मारक ‘ए’ डिभिजन लिग खेलाइरहेका ७ रेफ्रीको राजीनामासँगै लिग नखेलाउने निर्णय गरेकालाई थप ९ रेफ्रीले समर्थन गर्दै लिग नखेलाउने निर्णय गरेका छन् ।

शीर्ष डिभिजनको लिग जारी रहँदा  एन्फा अध्यक्षले गरेको व्यवहारका कारण लिग नखेलाउने निर्णय गरेको रेफ्री स्रोतले न्युज कारखानासँग बताएको छ ।

यस अघि जारी लिग खेलाइरहेका ७  फिफा रेफ्रीले एन्फा अध्यक्ष कर्मा छिरिङ शेर्पा समक्ष राजीनामा पत्र बुझाएका थिए । यसअघि ९ रेफ्रीले राजीनामा बुझाए पनि विभागबाट दबाब आएका कारण आर्मीका दुई रेफ्रीले नाम फिर्ता लिएका हुन् ।

७ फिफा रेफ्रीलाई समर्थन गर्दै अन्य लिग खेलाउने क्याटगोरी ए का ९ रेफ्रीले समेत लिगमा सहभागी नहुने निर्णय लिएका हुन् ।

यस अघि एन्फाले गत डिसेम्बरमानै १० पुरुष र २ महिला गरी १२ रेफ्रीको फिटनेस टेस्ट गरी फिफा ब्याज नवीकरण गरेको थियो ।

तर लिग दौरान एन्फा अध्यक्ष सहित एन्फा रेफ्री निर्देशक गौतम कौरले पुनः टेस्ट मागेपछि आफूहरूले आपत्ति जनाएको र त्यसपछि एन्फा अध्यक्ष कर्माले आफूहरू प्रति गरेको घृणित व्यवहारका कारण राजीनामा दिन बाध्य भएको  रेफ्रीस्रोतले जानकारी दियो ।

‘हाम्रो डिसेम्बरमा मात्रै टेस्ट भएको हो । उहाँ  अहिले लगत्तै लिन्छु भन्नुहुन्छ । तर हामीले समय पनि मागेका छौं । एक महिना पछि राख्नुस् हामी तयार छौं भनेको हो ।  अहिले नै गर्दा लिग जारी छ । इन्जुरीको समस्या हुन्छ भन्ने हाम्रो तर्फबाट कुरा राख्दा उहाँले राजनीति गर्ने, पावर देखाउन आएको ।  मसँग सिधै कुरा गर्ने । लिग नखेलाउनु भनेर हामीविरुद्धनै लाग्नुभयो ।  त्यसपछि राजीनामा पत्र बुझाउन बाध्य भएको हौं ।’ रेफ्री स्रोत भन्छ ।

यससँगै सहिद स्मारक लिगको तेस्रो चरणका खेल भोलिदेखि रंगशालामा सुरु हुँदै गर्दा सो खेलहरू हुने वा नहुने भन्नेमा अनिश्चितता बढेको छ ।

लिगका लागि तयार गरिएका मुख्य १७ रेफ्रीले लिग नखेलाउने  हस्तलिखित निर्णय नै गरिसकेका छन् । यस्तै केही रेफ्री भने एन्फा परिसर नजिक नभएकाले मौखिक प्रतिबद्धता जनाएका छन् ।

प्रतिक्रिया

सम्बन्धित सामाग्री

फेसबुक