एमाले पदाधिकारीमा ओलीद्वारा प्रस्तावित सबै विजयी

काठमाडौँ । नेकपा एमालेको दशौँ राष्ट्रिय महाधिवेसनमा नयाँ नेतृत्व चयनका लागि भएको पदाधिकारीको निर्वाचनमा अध्यक्ष केपी शर्मा ओलीद्वारा प्रस्तावित टीम नै निर्वाचित भएको छ ।

ओलीले अध्यक्षमा आफूसहित पदाधिकारीहरु र ३०१ केन्द्रीय सदस्य नै सर्वसम्मतिका लागि हलमा प्रस्ताव गरेका थिए तर त्यसमा सर्वसहमति हुन नसकेपछि सोमबार राति निर्वाचन भएको थियो ।

निर्वाचनमा ओलीले कुल खसेको दुई हजार ९६ मध्ये ओलीको पक्षमा १ हजार ८४० मत पाए भने उनका प्रतिद्वन्द्वी डा भीम रावलले रावलले २२३ मत पाए । दुवै उम्मेदवारलाई भोट दिन नचाहने अर्थात नाे भाेटमा ३३ मत खसेकाे थियो ।

यसैगरी छ जना उपाध्यक्षका लागि भएको निर्वाचनमा अष्टलक्ष्मी शाक्यले सर्वाधिक १ हजार ९७६ मत पाइन् भने सुरेन्द्र पाण्डेले १ हजार ९२५, सुवासचन्द्र नेम्वाङले १ हजार ८६५, विष्णु पाैडेलले १ हजार ८५६, युवराज ज्ञवालीले १ हजार ८४२ र रामबहादुर थापा बादलले १ हजार ७६८ मत पाएर विजयी भएका छन् ।

उपाध्यक्षका अर्का उम्मेदवार घनश्याम भुसालले भने ७२५ मत पाएका छन् ।

यसैगरी सचिव पदका लागि भएको निर्वाचनमा टोपबहादुर रायमाझी, योगेश भट्टराई, पद्मा अर्याल, छविलाल विश्वकर्मा, रघुवीर महासेठ, लेखराज भट्ट र गोकर्ण विष्ट विजयी भएका हुन् ।